Черчи 2 йиллик танаффусдан сўнг “Атлетико” сафида майдонга тушади

“Матрасчилар” Испания Кубогининг 1/16 финал босқичидан ўрин олган жавоб учрашувида “Гихуэло” клубини қабул қилишади. Черчи “Атлетико” таркибида сўнгги бор 2014 йилнинг декабрь ойида майдонга тушган эди.

Алессио ўтган мавсумни ижара асосида “Милан” ва “Женоа” клубларида ўтказди. Шу йилнинг ёзида эса у жароҳати билан мадридликлар ихтиёрига қайтиб келди.

Маълумот учун, “Атлетико” - “Гихуэло” учрашуви 20 декабрь куни бўлиб ўтади. Бу жамоаларнинг илк учрашувида Диего Симеоне шогирдлари йирик (6:0) ҳисобда зафар қучишган эди.

“Кубок баҳси ўйин амалиёти кам бўлган футболчиларга ўзини кўрсатиш учун ажойиб имконият. Менинг севимли футболчим йўқ. Мен ҳамма билан бир хил муносабатдаман.

Черчи қийин даврни бошидан ўтказди. Айнан эртанги ўйинда мен унга имконият бераман. Унинг жамоадаги роли кўп жиҳатдан “Гихуэло” билан бўлиб ўтадиган ўйинга боғлиқ”, - деди Goal.com сайтига берган интервьюсида Симеоне.