Буюк қайтиш: Нафақадаги дўст (05.10.2017)

Шу муносабат билан Шаҳбоз Беғамовнинг Юпп Хайнкес жамоага расман бош мураббий этиб тайинланишидан бир кун олдин (05.10.2017) ёзган мақоласини қайта чоп этдик.

* Франк Рибери "Бавария" сафида саккизинчи бор Германия чемпионлигига эришди ва бу борада Швайнштайгер, Лам, Кан ва Шоллга етиб олди. Легионерлар ичида эса Рибери чемпион бўлиш бўйича якка пешқадамга айланди.

* Кетма-кет олти бор чемпион бўлган 9 нафар футболчилар: Мануэль Нойер, Том Штарке, Жером Боатенг, Давид Алаба, Рафинья, Хави Мартинес, Франк Рибери, Арьен Роббен ва Томас Мюллер.

* Илк маротаба Германия чемпиони номига сазовор бўлган футболчилар: Хамес Родригес, Никлас Зюле, Себастьян Руди, Корентен Толиссо ҳамда Кристиан Фрюхтль.

* Юпп Хайнкес Германияда энг қари мураббий сифатида чемпион бўлиш бўйича ўз рекордини янгилади. Бундан аввалги натижага ҳам айнан Хайнкес эришганди. Ўшанда 2013 йилги мавсумда Юпп 68 ёшида шоҳсупага чиққанди. Бу сафар 72 ёшида ҳам чемпионликни такрорлашга муваффақ бўлди.

* Юп Хайнкес жами тўртинчи маротаба Германия чемпиони унвонига сазовор бўлди.

Демак Шаҳбоз Беғамовнинг 2017 йил, 5 октябрь куни ёзган мақоласини қайта чоп этамиз.

Германиянинг энг ишончли нашри "Bild"нинг хабар беришича, "Бавария"ни мавсум якунига қадар Юпп Хайнкес бошқаради.

Қийин вазиятга тушиб қолган жамоани мавсум якунига қадар бошқариб туриши мумкин бўлган вариантлар ичида Юпп энг идеали, десак муболаға бўлмаса керак.

Анчелоттининг истеъфосидан кейин таниқли рус шарҳловчиси, Германия футболига ихтисослашган журналист Алексей Андронов "Бавария" мавсум охирига қадар Хайнкес ёки Хитцфельдга мурожаат қилиши ва бу икки мутахассисдан бири гарчи фаолиятини якунлаган бўлсада мюнхенликларга йўқ демаслиги ҳақида ёзганди. Ўшанда буни ўқиб, Ули Хёнесс шу ишни қилса ажойиб бўларди, деган ҳаёл ўтганди. Аммо мюнхенликлар раҳбарияти фаолиятини тугатган ва 4 йилдан буён футболдан узоқда турган Хайнкесни безовта қилишмаса керак, деб ўйлагандим.

Ули Хёнесс аслида жамоага Юлиан Нагельсманнни жалб этмоқчи эди. Лекин мавсум ўртасида ёш иқтидорли мураббийни "Хоффенхайм"дан "юлиб" олиш ҳам қийин, ҳам нотўғри бўларди. Кейинги номзодлар Юрген Клопп ва Йоахим Лёв борасида ҳам камида ёзгача кутишга тўғри келади.

Томас Тухель номзоди эса "Бавария" раҳбариятига маъқул келмаган кўринади. Чунки клуб қафасда ётган "шер"ни яна жамоага қайтармоқчи.

Бу мавсумни катта талофатларсиз ва сенсациясиз ўтказишни режа қилган Ули Хёнесс яна ўз дўстига мурожаат қилишга қарор қилган кўринади.



Юпп Хайнкес бунга қадар Луи ван Гаалдан кейин ҳам жамоани оғир пайтда қўлга олганди. Ўшанда ҳам Ули Хёнесс ўзининг энг яқин дўстига илтимос қилган ва янги мураббий топгунга қадар Юпп билан 2 йиллик шартнома имзолаганди.

Айтмоқчи бўлганим, "Бавария"га тез ёрдам кўмагини бериш Юпп учун бегона эмас. Агарда бу қайтиш амалга ошадиган бўлса, унда Хайнкес "Бавария"ни учинчи бор бош мураббий сифатида қабул қилиб олган бўлади.

Хайнкеснинг фаолиятидаги сўнгги икки йил (2012, 2013) "Бавария"да ўтди. Юпп 68 ёшида фаолиятини жуда чиройли (Германия чемпионлиги, Германия кубоги соҳиби ва ЕЧЛ ғолиби сифатида 2013 йилда мураббийлик) якунлаганди.

Ули Хёнесснинг энг яқин дўсти, "Бавария" оиласининг энг қадрли вакили, клубга қийин паллада ҳар доим "лаббай" дея жавоб берадиган Хайнкесга мюнхенликлар яна эҳтиёж сезишмоқда.
Юпп "Бавария"ни жуда яхши билади ва бу оғир паллада яна жамоа жонига оро кириши лозим. Шу боисдан ҳам клуб раҳбарияти ушбу эндигина бошланган мавсумни муваффақиятсиз ўтказмаслик мақсадида Юппнинг хизматларидан фойдаланишмоқчи.

Юппнинг "Бавария"даги ажойиб мавсумидан кейин фаолиятини тугатиш чоғида "Реал" ва "Барселона"дан келиб тушган таклифларни рад этган Юппнинг нафақадаги ҳордиғи яна бузиладиган кўринади.

"Бавария" етакчилари Роббен, Рибери, Мюллер ва Нойер клуб раҳбариятига ким билан бўлсада Германия чемпионлигини олиб бераверамиз, аммо ЕЧЛни кўзламоқчи бўлсак, бизга Юпп бобони чақириб беринглар, дейишган бўлса ҳам ажаб эмас.

2013 йилги супер мавсумдан кейин "Бавария" анча ўзгарди. Жамоадан кўплаб футболчилар кетишди, баъзи етакчилар Юпп сингари анча қариб қолишди.
Лекин барибир ўша жамоанинг асл ўзаги сақланиб қолган.



Ўша мавсумдаги 9 нафар футболчи (Нойер, Штарке, Боатенг, Алаба, Рафинья, Мартинес, Мюллер, Рибери, Роббен) ҳозир ҳам "Бавария"да.

Бу футболчиларнинг имкониятларини Хайнкес жуда яхши билади. Шунингдек, ушбу футболчилар ҳам мавжуд муаммони бартараф этиш ва оғир палладан чиқиб кетиш учун Юппга энг асосий кўмакчи бўлишлари талаб этилади.

Рибери, Роббен, Мюллер, Нойер каби етакчиларнинг Юпп билан жуда илиқ муносабати ҳам қисқа вақт ичида жамоани қаддини тутишига катта ёрдам бериши мумкин.

"Бавария"да ўйнаётган Артуро Видаль ҳам Юпп учун бегона эмас. Ўз вақтида Видалнинг янги даражага чиқишида Хайкеснинг хизмати синган. Чунки улар "Байер"даги фаолият орқали жуда яхши таниш. Бу жиҳатлар Хайнкес учун жамоани қаддини кўтаришга ёрдамлашиши аниқ.

"Бавария"нинг айни пайтдаги энг катта муаммоси бу муҳитдаги носоғломлик. Шу жиҳат жамоанинг ўйинига ўз таъсирини кўрсатмоқда.
Юпп Хайнкес даврида эса жамоа бирлаша олган ва ушбу мутахассис барча билан алоқаларни яхши йўлга қўйишни билади. Муҳими, Юппнинг "Бавария"даги авторитети жуда юқори.
Нафақадаги мураббий қўл остидаги 20 нафар футболчига ўйин амалиётини деярли тенг тақсимлай олиши ва ўйин балансини ҳам меъёрда ушлаб туриш бўйича уста.

Анчелотти жамоани ўйнатган тактик схема 4-2-3-1ни айнан Юпп "Бавария"да қўллаган. Тактик тарафлама жамоанинг ўйин стратегияси катта эҳтимол билан ўзгармайди. Юппнинг қиладиган иши муҳитни яхшилаш ва жамоа ўйинини бир механизимга солиб олиш.

Ушбу мутахассис жамоага қайтаётганидан барча мюнхенлик ишқибозлар ва немис матбуоти жуда хурсанд. Чунки "Бавария"ни мавсум якунига қадар қутқариб қолиши мумкин бўлган энг идеал вариант ва номзод айнан Хайнкес эди.

Аммо Юпп 4 йиллик танаффусдан кейин қай даражадага шиддат билан ўзгараётган ва тезлашаётган футболга киришиб, кўникиб кетиши номаълум.

Ули Хёнесс "Бавария" келажагини Юлиан Нагельсманн, Юрген Клопп ёки Йоахим Лёв билан қурмоқчи. Шу боисдан ҳам Томас Тухель вариантидан воз кечилди ва тез ёрдам сифатида нафақадаги дўсти ва "Бавария" оиласининг энг қадрли вакилига мурожаат қилинди.

Бу билан клуб раҳбарияти келажак ҳақида бемалол бош қотириши мумкин. Чунки ҳозирги мавжуд вазиятни ўнглаш тўлиқлигича Юппга топширилади. Ули Хёнесс эса жамоага бош мураббий топиш ва "Бавария"нинг узоқ йиллардан буён алмаштириб бўлмас "қанот"лари ҳисобланган "Роббери"га муносиб ворис излаши керак.

"Бавария" футболчилари эндиликда нафақадан қайтаётган афсонанинг жуда чиройли якунланган карьерасини бузиб қўймасликлари учун ҳам даҳшатли мавсумни ўтказишга мажбурлар.

Аҳил оила

Дастлаб ўтган йили кузда клуб президентлигига Ули Хёнесс қайтди. Яқинда Нойернинг жароҳатидан сўнг ўтган мавсум фаолиятини якунлаган яна бир дарвозабон Том Штарке қўлқопларини жавондан олишга мажбур бўлди. Энди эса нафақада дам олаётган Юпп Хайнкес набираларини олдига келмоқда.
Бу "Бавария" қандай иноқ ва аҳил оилалигидан дарак беради.

Қийин паллада ҳар доим биринчилардан бўлиб ўз яқинларинг ёрдам қўлини чўзади дегани шу бўлса керак.

Ғалати бошланган мавсумдан кейин "Бавария" "босс"лари қафасдаги шерни жангга ташлашга мажбур бўлишди. Қариб қолган бўлсада, "шер" барибир "шер"лигини қилишига ишонишмоқда.

Юппнинг "Бавария"га қайтиши жамоани эйфорияга берилишига, европа грандларини эса анча сергак тортишига сабабчи бўлиши аниқ. Чунки Юпп Хайнкес даврида "Бавария" ўз тарихидаги энг сермаҳсул мавсум ва кучли ўйинни намойиш этган. Хайнкес бошқарган 2012-2013 йиллардаги жамоанинг ўйини тарихдаги энг кучлиси дея эътироф этилади.

Қариб қолаётган Рибери ҳамда Роббен Юппнинг икки қанотига ўтиши ва ушбу мавсумда бирга парвоз қилишлари лозим. Бу икки ҳақиқий афсонанинг Мюнхендаги фаолиятини юқори нотада тугатиш учун ажойиб имконият.

Нафақадан қайтаётган Юппнинг келиши "Бавария"нинг букилиб қолган қаддини кўтаришга хизмат қилиши аниқ...