“Бунёдкор” ОЧЛ учун аккредитация жараёнини тўхтатди

"Қалдирғочлар"нинг Чемпионлар лигасидаги уй учрашувларида ўйиндан олдинги ва кейинги матбуот анжуманлари, ишлаш учун қулай қилиб жиҳозланган медиа-трибуна, беллашувга оид материаллар тарқатиладиган ва қаламкашлар ишига мувофиқ таъминланган матбуот маркази, беллашув қатнашчилари билан бевосита суҳбат қуриш жойи бўлмиш микст-зона ҳамда дарвозалар ортига (сураткашлар учун) ўтиб бориш ҳуқуқини берадиган рухсатнома карточкаларини олиш учун журналистлардан аризалар 15 февралдан 3 мартга қадар қабул қилинди. Баъзи ОАВ вакиллари илтимослари инобатга олиниб, ҳужжатларни кечикиб ҳам қабул қилдик.

“Бунёдкор” ФКнинг Осиё Чемпионлар лигасидаги учрашувларини ёритиб бориш учун 165 нафар ОАВ вакилларига аккредитация карточкаларини тайёрлади.

Осиё Чемпионлари лигаси учун тайёрланган аккредитация ҳужжатлари ўз эгаларига 10 март куни “Пахтакор” стадионида “Бунёдкор” – “Ал-Жаиш” учрашуви олдидан бўлиб ўтадиган матбуот анжуманида тарқатилади.