Буффон, Ибрагимович, Бруну Алвеш ва бошқа "крутой" қариялар

А Серия 17 турида "Милан" уйда "Торино" билан учрашди. Ушбу баҳсда "россонери"нинг 39 ёшли форварди Златан Ибрагимович ноябрдан бери энди майдонга тушди (швед жароҳатлар қуршовида эди), Скудетто учун курашда "Милан"нинг муҳим бўлган ўйинида иштирок этди ("Ювентус"га қарши баҳсдаги мағлубиятдан сўнг жамоа ўз ўрнини тиклаб олиши керак эди). Унинг ўйинларини кўриб, бугун "кекса, аммо фойдали" бўлган ўйинчилардан тузилган терма жамоани эътиборингизга тақдим этмоқчимиз.

Дарвозабон

Жанлуижжи Буффон ("Ювентус"; Италия) — 42 ёш
28 январда замонавий футболнинг буюк дарвозабони 43га тўлади, бироқ Жижжи футболга бўлган иштиёқини сақлаб қола олган. Ҳа, у Чемпионлар Лигасида ғолиб чиқмагунча футболдан кетмаса керак. Айтганча, айнан шу турда Буффоннинг жорий мавсумдаги кўрсаткичи янгиланди: "Камп Ноу"да қуруқ ўйин ўтказди ва "Ювентус"га рақиби "Барселона"ни мағлуб этишида ёрдам берди. Жанлуижжи "Кекса синьора" ўйинчиси Войцех Щеснийдан биринчи рақамни олиб қўйиши учун имконияти етарли.

Ҳимоячилар

Кристиан Мажо ("Беневенто"; Италия) — 38 ёш
XXI асрда фаолиятини бошлаган бу футболчи бир ойдан сўнг 39 ёшни қарши олади. Кристиан — "Виченца" тарбияланувчиси бўлиб, "Фиорентина", "Сампдорию" ва "Наполи" каби жамоаларда муваффақият қозонган, икки бор Италия Кубогига эга чиққан ва "Скуадра Адзурра" футболкасида 34 маротаба майдонга тушган. Шунингдек, ЖЧ-2010 ва Евро-2012да иштирок этган. Мажо ҳозир Филиппо Индзаги назоратидаги "Беневенто"да тўп тепмоқда. Кристиан клуб сафида В Серияда икки мавсум ўтказди, энди эса элитада ҳаракат қилмоқда.

Хилтон ("Монпелье"; Бразилия) — 43 ёш
Ҳеч қаримайдиган Хилтон "Монпелье" ҳимоя марказини кучайтирмоқда. 15 йилдан кўпроқ вақтдан буён Лига 1да иштирок этади, 2009/10 йилги мавсумда Дидье Дешам назорати остидаги "Марсель" сафида Франция чемпиони бўлган. Орадан икки йил ўтиб, ҳозиргача тўп тепаётган жамоаси "Монпелье" билан титулга эга чиқди. У четдан шунчаки кузатиб турмай, ҳақиқатдан бор кучи билан ўйнайди: бу мавсум 12 ўйинда (637 дақиқа) майдонга тушди.

Бруну Алвеш ("Парма"; Португалия) — 39 ёш
Бруну Алвеш "Зенит"да ўйнаб юрган кезларидаёқ Португалиянинг кўпкаррали чемпиони ва тажрибали ўйинчи номига сазовор бўлиб улгурганди. Португал Россиядан кетганидан Евро-2016да ғолиб бўлди ва ҳанузгача А Серияда тўп тепмоқда. Бруну Алвеш — "Парма"нинг етакчи ҳимоячиси ва сардори.

Фил Ягелка ("Шеффилд Юнайтед"; Англия) — 38 ёш
Фил "Эвертон"да 12 йил ўйнаб, анча машҳурликка эришган, аммо бугунги кунда Ягелка ватанидаги "Шеффилд Юнайтед" шарафини ҳимоя қилмоқда. Фил — "ҳанжарчилар" тарбияланувчиси, 1999/2000 йилги мавсум шу клубда фаолиятини бошлаган ва "ирискалар" сафига ўтишдан олдин деярли 300та ўйинда майдонга тушган. Ягелка 2019 йил "Шеффилд"га қайтди ва майдонга кўп тушмаслигига қарамай, унинг тажрибаси ва етакчилик сифатлари "ҳанжарчилар"га катта ёрдам бермоқда.

Ярим ҳимоячилар

Андрес Д`Алессандро ("Интернасьонал"; Аргентина) — 39 ёш
"Ривер Плейт" тарбияланувчисини йўлнинг бошида ёрқин фаолият кутаётгани тахмин қилинганди, Андресни кимсан Марадона ва Рикельме билан солиштиришганди, лекин Д`Алессандро машҳур ҳамюртлари даражасига ета олмади. Европани тезда айланиб чиққач, ("Вольфсбург", "Портсмут", "Сарагоса"), кўпчилик учун кутилмаганда Бразилиядан қўним топди ва "Интернасьонал" афсонасига айланди. Куни-кеча эса Андрес Уругвайнинг "Насьонал" жамоасига бориб қўшилди ва апрелда 40 ёшини қарши олишга тайёрланмоқда.

Хоакин Санчес ("Бетис"; Испания) — 39 ёш
Хоакин Испания термаси сафида катта ғалабалар давригача 50тадан кўп ўйин ўтказган — Арагонес ва Дель Боске жамоаларида эса унга жой топилмади. Шундай бўлсада, Санчес ҳамон испан майдонларини чангитиб юрибди ва ОАВ вакиллари учун ёрқин сарлавхаларга имкон яратамоқда. Ўтган мавсум Хоакин "Бетис" шарафини ҳимоя қилди ва ўйинларни тўлиқ ўтказди, лекин "пандемия танаффуси"дан кейин бироз сустлашди ва энди вирусни ўзи юқтириб олди.

Лучо Гонсалес ("Атлетико Паранаэнсе"; Аргентина) — 39 ёш
Бразилиядан қўним топган яна бир аргентиналик: охирги тўрт йилни Лучо Гонсалес "Атлетико Паранаэнсе"да ўтказди. Европада Лучо узоқ вақт "Порту" ва "Марсель" сафида муваффақиятли ҳаракат қилди, ушбу клублар билан бирга қатор совринларни қўлга киритди.

Ҳужумчилар

Жермейн Дефо ("Глазго Рейнджерс"; Англия) — 38 ёш
2014 йил Жермейн Дефо океан ортига, "Торонто" шарафини ҳимоя қилишга йўл олганда, унинг фаолияти якунига кўп қолмагандек туюлганди. Лекин футболчи бундай ҳолатга узоқ чидолмади ва Британияга қайтди ҳамда аввалига "Сандерленд" ва "Борнмут"да ўйнади, ҳозир эса Стивен Жеррард ва "Рейнджерс" билан фаолиятидаги илк чемпионликка дадил одимламоқда.

Родриго Паласио ("Болонья"; Аргентина) — 38 ёш
5-февраль куни аргентиналик 39 ёшни қаршилайди, у эса ҳамон "Болонья" асосий таркибида тўп тепмоқда. Бу Паласио учун 2009 йилдан буён учинчи Италия клуби. Ҳозирда ўзбек мухлислари диққат марказидаги "Женоа"да ном чиқарган Родриго "Интер"дан таклиф олди, энди эса "Болонья" шарафини ҳимоя қилмоқда. Родриго ҳисобида италиян жамоалари сафида 400 учрашув ва 112 та гол.

Златан Ибрагимович ("Милан"; Швеция) — 39 ёш
Бу ҳурматли "отахон" эса қарилик чоғида яна бир бор Скудеттони қўлга киритиши мумкин. Златан "Милан"да жам бўлган иқтидорли ёшларни олға бошламоқда ва ўз коллекциясида кам бўлмаган совринларни қўлга киритишда иштиёқ уйғотмоқда.

Охирги икки ойни Ибрагимович жароҳат сабаб ўтказиб юборди, унгача эса чемпионатнинг 7 учрашувида 10та гол урганди. Бундай "крутой" "отахонлар"ни, айнан замонавий ҳужумчилар ичидан топиш мушкул вазифа.

Нозима Зарипова таржимаси