"Бразилия билан ўйнаш ниятим бор эди. Гуруҳдан чиқиш учун кўпроқ меҳнат қилишимиз керак". Футзалчиларимиз Жаҳон чемпионати қуръаси ҳақида қандай фикрда?

Қуръага кўра, Баҳодир Аҳмедов бошчилигидаги Ўзбекистон миллий терма жамоаси "B" гуруҳида Россия, Миср ҳамда Гватемала терма жамоалари билан баҳс олиб борадиган бўлди. Биз қуръа натижалари ҳақида терма жамоамиз футзалчилари Даврон Чориев ва Ихтиёр Ропиевнинг фикрлари билан қизиқдик.

Даврон Чориев -  Жаҳон чемпионатида иккинчи бор иштирок этамиз. Бу албатта бошқача ҳиссиётларни беради. Қуръа натижасини барчамиз яхши қабул қилиб олдик. Бундай мусобақада оддий жамоа бўлмайди. Ҳар бир баҳсга жиддий қарашимиз талаб қилинади. Мен кўпроқ Бразилия билан ўйнашни истагандим. Майлин нима ҳам деймиз. Гуруҳимиздаги рақибларга келсак, Россия ҳақида маълумотларга эгамиз. 2016 йил Колумбиядаги мундиалда улар жуда яхши натижа қайд этишганди. Гуруҳдан чиқиш имкониятларимизни ёмон, демаган бўлардим. Мухлислларимизни хурсанд қилиш учун бор кучимизни ишга соламиз.

Ихтиёр Ропиев - Қуръа ташлаш маросимидан олдин Литва, Аргентина, Чехия билан бир гуруҳдан жой олишимизни тахмин қилгандим. Якунда Россия, Миср, Гватемала бизга рақиблик қилиши аниқ бўлди. Гуруҳдан чиқишимиз учун кўпроқ меҳнат қилишимиз керак. Имкониятимиз бор. 

Абдулазиз Искандаров ёзиб олди.