Бойдуллаев жарроҳлик столига ётқизилди

Мамлакат чемпионатининг 21-турида Қаршида “Нефтчи” жамоаси билан бўлган ўйиннинг 10-дақиқасида Бойдуллаев тўп учун курашда фарғоналиклар аъзоси Иқбол Акрамов билан тўқнашиб кетди. Натижада футболчимизни яшил майдондан тўғри шифохонага олиб кетишди.

Душанба куни пойтахтмизда жарроҳлик столига ётқизилган футболчининг айтишича, ўйин пайтида майдонга  ноқулай йиқилиши натижасида елка қисми суяклари жиддий жароҳатланган.

-Шифокорлар бир ойдан сўнг жароҳатдан фориғ бўлишим мумкинлиги ҳақида айтишди, -дейди футболчининг ўзи. –Дастлаб индивидуал машғулотларни бошлайман. Январ ойидан бошлаб жароҳатим битишига қараб умумий гуруҳга қўшилишим мумкин экан.

Таъкидлаш жоизки, бунгача Шоҳруҳ Гадоев, Алишер Юсупов етакчи футболчиларимиз жароҳат олиб, анча муддатга сафдан чиқишганди. Мавсум бошида жиддий  жароҳат олган Кенжа Тўраев ҳозирда умумий гуруҳда машғулотларга қатнашаётган бўлса, Ўзбекистон кубоги финалидан сўнг сафдан чиққан ҳимоячи  Шуҳрат Муҳаммадиев ҳам кейинги турлардан жамоамиз ёрдам бериши мумкин.