Бахтиёр Бобоев: "Янги мавсумгача жамоада хорижлик мураббий иш бошлаши мумкин"

"Бугунги ўйиндан қониқдим. Бироқ ҳисоб менга маъқул бўлмади. Йигитларнинг кўрсатган ўйинлари яхши даражада бўлди. Умуман бугун стадионга келган мухлислар чиройли ўйин гувоҳига айланишди. Жамоаларда якуний зарбани беришда муаммолар кўзга ташланди. Масалан бизда Сато Минори, Виктор Карпенкода гол уриш учун яхши имконият пайдо бўлганди. Бироқ ўша вазиятларда ҳужумни самаралари якунлай олмадик. "Насаф"да чарчоқ аломатлари сезилди. Улар бугун финалда кўрсатган ўйинларидан фарқли равишда бошқача ўйин кўрсатишди. Мен кейинги мавсумда жамоани бошқармайман. Мен мураббий эмасман. Биз номзодларни кўриб, уларни ўрганиб чиқмоқдамиз. Янги мураббий чет элдан ҳам бўлиши мумкин. Ҳозирча учтага яқин хорижий мутахассислар билан музокара олиб бордик. Улар ўйлаб олиш учун вақт сўрашган. Шу боисдан айнан ким эканлигини ошкор қилмоқчи эмасман. Шунингдек, ўзимиздаги мураббийларнинг ҳам номзодларини ўрганиб чиқмоқдамиз. Янги мавсумгача "Бунёдкор"да янги бош мураббий иш бошлаши аниқ ", - деди Бахтиёр Бобоев.