"Барселона" Рэшфордни ўз таркибига қўшиб, таваккал қилди. Маркус бу трансфер амалга ошиши учун 10 миллиондан воз кечди

"Барселона"даги навбатдаги инглиз.

Инглизларга керак бўлмай қолган англиялик

Маркус "Манчестер Юнайтед"га керак бўлмай қолди, сабаби ҳаммаси етмагандек унга ҳафтасига 375 минг евро маош берилади. Буюк клубда ҳозирги даврда ҳаттоки қоғозга сарфланаётган пул ҳам тежалмоқда. ОАВ вакиллари билан суҳбатда клуб ходимларидан бири ҳазил тариқасида ҳозирда "Манчестер Юнайтед" қароргоҳига клуб бюджетидаги пулга сотиб олинган қоғоз конвертидан кўра, наркотик воситаларни олиб кириб кетиш осонроқлигини айтган. Рэшфорд ўзига хос образи учун маблағ сарфлади. У муҳтожлар ва Англиянинг ўзидаги болалар учун бир нечта йирик хайрия ишларини амалга оширди.

Кейин Рэшфорднинг "дайдиши" оқибатида барчаси эсдан чиқди. Кўнгилҳушликлар уни аввалига "Астон Вилла"га ижарага йўл олишига, кейинроқ эса — қадрдон клуби таркибидан чиқариб юборилишига сабаб бўлди. Маркус шу даражагача бордики, ёзда ҳеч бир клуб унинг шартномасини сотиб олишни истамади. Қийинчилик билан "Барселона"га ижара варианти ҳал этилди. Бироқ бу трансфер амалга ошиши учун Рэшфорд маоши сезиларли тарзда қисқаришига рози бўлди: йилига бонусларсиз 19,4 млн евро ўрнига у Каталонияда максимум 10 млн евро ишлаб топиши мумкин. Маркус Ямал, Рафинья ва Левандовски билан бирга тўп тепиш учун 10 миллион евродан воз кечди.

"Манчестер Юнайтед" бу вазиятда 19,4 миллион евро тежаб қолади. Англия терма жамоаси ва "Барселона"нинг собиқ форварди Линекер ўз саҳифаси расмини ўзгартириб, у ерга ўзи ва Рэшфорд акс этган коллажни жойлаштирди. 

Аввалроқ, "Челси" Маркуснинг ошнаси Жейдон билан шартнома тузган, лекин кейинроқ бош мураббийнинг қарори билан уни таркибга киритмай қўйганди. Натижада, "аристократлар" вингер билан можаро чиқариб, вазиятни ёмонлаштиргандан МЮга жарима пули тўлаб қўя қолган яхши деб топишди. "Барселона" аввалроқ "Атлетик"дан Уильямсни сотиб олиши керак эди, томонлар барчасини келишиб ҳам қўйгандек эди, аммо вингерни рўйхатдан ўтказиш учун пул топа олмагани туфайли барчаси барбод бўлди. "Барселона" дарвоза чизиғига Гарсияни олиб келди, кейинги масала ҳужум. Рэшфорднинг ижараси ҳар қанақасига баҳсли қарор. Маркус "Астон Вилла"да ўзини яхши томондан кўрсатишга ҳаракат қилганига қарамай, айни дамда уни — "Барселона" ёки аввалроқ унга қизиқиш билдирган ПСЖ асосий таркибига мос футболчи дейиш қийин.

Флик ўзининг педагоглик иқтидорига ишонади

Флик ўзгача характерли инсон. У бир неча бор "Барселона" қароргоҳидан чиқаверишда автомобиль йўлига яқин келган мухлисларга маъруза ўқиб берган. Аслида, немис ҳақ: болакайлар ва ўсмирларни қароргоҳдан спорт автомобиллари "учиб чиқаётган" вақтда қаровсиз қолдириш нотўғри бўлади. Ҳайдовчининг битта омадсиз ҳаракати — ва йўқ жойдан фожиа юз беради. Яхшики, футболчилар ҳам дарвозалар ортида мухлислар бўлишини билишади ва дарҳол газ педалини охиргача босишмайди. Бироқ Флик шу нарсага ҳам эътибор бергани, германиялик мутахассиснинг атрофдагилар билан умуман иши йўқ, деган фикрни йўққа чиқаради. 

Немис келганида Лапорта Рафиньяни умуман ёқтирмай қолган ва уни йўқотиш пайига тушганди. Бразилияликнинг характери ҳам анча оғир, клуб унинг трансферидан тушган пулларни "Атлетик"га Уильямс учун тўламоқчи эди. Флик басклар билан келишув охирига етмаганига қарамай, бразилияликни қўйиб юбормади. Натижада, вақт ўтиб, вингер клуб сардорларидан бирига айланди ва фаолиятидаги энг яхши мавсумлардан бирини ўтказди. Ёзда Лапорта барибир Уильямсни жамоага олиб келишни истади. Ла Лига президенти Тебас "Барселона"нинг бу трансферга пули борлигига ишонмади. Натижада, чиндан Нико Каталонияга кўчиб ўтмади.

Уильямс жонажон жамоаси билан узоқ йиллик янги битим имзолади ва "Барселона" ҳужум чизиғига янги ўйинчисиз қолди. Левандовски ажойиб спорт формасида. Робертнинг аёли Анна спорт соҳасида олий маълумотга эга ва айнан у турмуш ўртоғининг спорт формасини яхши ҳолатда бўлишида катта роль ўйнамоқда. Аммо Левандовски яқинда 37 ёшга тўлади. У Суаресдан бор йўғи бир ярим ёш кичик, "Барселона"нинг собиқ форварди ҳозир қандай ҳолатдалигини клублар ўртасидаги жаҳон чемпионати яққол кўрсатиб берди. Левандовски ташқи кўринишидан жуда яхши спорт формасида, аммо унинг мушаклари ва бўғимлари худди Суаресникидек ёш эмас.

Роберт "Барселона"даги ёш ҳамкасблари билан яхши чиқиша олди, лекин унга ҳам ўринбосар керак. Ямаль, Ольмо ва Рафинья олдинда Торрес билан бирга ҳаракат қилишни яхши кўришади. Бироқ "ўнлик" нуқтасида Рафинья ўйнаса, чап қанотда Рэшфорд учун жой очилади. Маркус марказда ҳам, қанотда ҳам ўйин тажрибасига эга. Позиция бўйича мантиқан тўғри трансфер. Шунингдек уни рўйхатдан ўтказиш ҳам осонроқ бўлади, сабаби фақатгина 10 миллион евро маош масаласи бўлади. Қолгани қандай кетиши эса мураббий Фликнинг педагоглик қобилиятига боғлиқ.

Ханс-Дитер бу трансферга розилик берганидан билиш мумкинки, у Рэшфордни тўғри йўлга солишига ишонмоқда. Ким билади дейсиз, балки германиялик ҳам худди Моуриньодек адашаётгандир. Португалиялик Рэшфорд ва Погба МЮда унинг қўл остида катта юлдузлар даражасига чиқишига ишонганди. Бироқ ҳеч нима ўхшамади. 

Рэшфорд катта ўйинларни соғинган бўлса ажаб эмас

Бруну Фернандешнинг узатмалари МЮ форвардларини ортиқча асаббузарликдан қутқаргани аниқ. Бироқ "қизил иблислар" икки йил аввал Европа Лигасида "Барселона"ни мағлубиятга учратган бўлсаларда, анчадан буён энг юқори даражадаги ўйинлардан четда қолмоқда, Флик эса "Барселона"га мана шу жиҳатни кафолатлади. Мураббий чекланган бюджет билан ҳам фарқ қила олмоқда. Ханси фаолиятида муваффақиятлар билан бир қаторда омадсизликлар ҳам учраганига қарамай, Рэшфорд учун бу имконият ва у "Барселона"га имкон қадар кўпроқ фойда келтириши зарур. Ямаль, Рафинья ва Ольмо англиялик майдонда фаолиятини қайта жонлантиришида ёрдамчи бўлишади.

Ўтган мавсум Ла Лигада Ольмо ва Торрес 10 тадан гол уришди. Дани одатдагидек маълум вақт жароҳатлар туфайли лазаретда қолган бўлса, Ферран фақатгина Левандовскининг ўринбосари сифатида эди. Рэшфорд эса полшалик футболчига кўпроқ дам олиш имкониятини яратиб бериши мумкин. Флик учун Левандовскининг ҳолати муҳим. "Интер"га қарши Роберт жароҳатдан энди қайтганди ва захирадан тушиб, жамоани қутқариб қола олмади. Фликка шу паллада ҳужумнинг иккинчи тўлқини етишмади. Ольмо ва Торрес доим ҳам бир хилда топ даражада ўйин кўрсата олмайди.

Ҳужум чизиғини кучайтириш керак эди, лекин "Барселона"нинг молиявий имкониятлари чекланган. 2,5 миллион евро эвазига улар асли суриялик Барджини Швециядан таклиф қилишди. Руни ҳозирча "Барселона Б"га қўшилди, асосий жамоа эса Рэшфорднинг голларига муҳтож. Маркус "Барселона"да Линекер даражасига чиқишига ишониш қийин. Гари каталонияликлар сафида 138 та ўйинда 51 та гол урган. "Тоттенхэм" форвардини асосий таркиб учун таклиф қилишган. Рэшфорд эса захирада ўз вақтини кутиши ва бошқа нарсаларга чалғимай, имкониятидан унумли фойдаланиши керак.

Маркусни чинакам профессионал дейиш қийин. "Астон Вилла"даги таништирув маросимига у қандай келгани ёдингизда бўлса керак. Тармоқларда Рэшфорднинг "Рокки" қахрамони каби машғулотлар олиб бораётгани акс этган постлар кўп учрайди, лекин статистикани бу билан алдаб бўлмайди. "Астон Вилла"да форвард 2-3 та гол урди ва узоқ қолмади. "Барселона" захирасида эса Маркус янада кучли мотивация билан яхшироқ ўйин кўрсатиши мумкин. Ўртага Рэшфорднинг орзуси – ЖЧ-2026 учун Англия қайдномасидаги ўрин қўйилган.