Баҳодир Насимов: "Мен мухлислик қилаётган жамоа уйга қайтиб бўлди"

Бугунга келиб плей-офф босқичининг аксарият иштирокчилари аниқланиб бўлди. Кутилмаганда, амалдаги жаҳон чемпиони Испания, шунингдек, ғолиблик учун даъвогарлардан бири ҳисобланган Италия, қолаверса, Англия терма жамоалари гуруҳдан ҳам чиқа олишмади. Бугун мундиалнинг 3-тури доирасида яна 4 та учрашув ўтказилади ва нимчорак финалнинг галдаги иштирокчилари аниқланади. Биз бугунги ўйинлар олдидан Ўзбекистон миллий терма жамоасига номзод ҳужумчи Баҳодир Насимовнинг фикрлари билан қизиқдик.

- Баҳодир, ЖЧ-2014 ўйинларини кўриб боряпсизми?
- Албатта. Лекин мен мухлислик қилаётган терма жамоа мундиалдаги иштирокини муддатидан аввал якунлаб бўлди. Амалдаги жаҳон ва Европа чемпионларига мухлислик қилаётгандим.

- Испаниянинг омадсиз иштирокига нима сабаб бўлди, деб ўйлайсиз?
- Улар ўйнаётган футболни ҳамма билиб олди. Шахсий фикрим, ҳужум чизиғида аввалги икки ўйинда Давид Вилья ўйнаши керак эди.

- Бош мураббий қанчалик айбдор?
- Мураббийни билмадиму лекин, Икер Касильяс ва Диего Костани майдонга туширмаслик керак эди.

- Нима учун?
- Касилья жаҳон чемпионатига тайёр эмасди. Коста эса, ҳали Испания терма жамоаси таркибида ўйнаш учун муносиб эмас эди. Қайси маънодаки, Диего эндигина терма жамоа танловида бир қарорга келиб, ҳали испанлар ўйинига мослашиб улгурмаганди. Аммо, ўз клубида етакчи ролида бўлганди.

- Испания, Италия, Англия терма жамоалари гуруҳдан чиқа олишмади. Кўпчилик сингари сиз учун ҳам бу кутилмаган ҳолат бўлдими?
- Испания ва Италия борасида фикрингизни қўллаб-қувватлайман. Ҳақиқатан ҳам, бу икки терма жамоанинг гуруҳдан чиқишига ишонгандим.

- Англиягачи?
- Инглизлар ўйнай олишмади. Шу боис, улар қайд этган натижани сенсациялар сафига қўшмайман.

- Бугун оқшом ўтказиладиган ўйинлар ҳақида нима дейсиз?
- Эрон ғалаба қозона олмаса керак. Улар Аргентина билан ўйинда кўп куч сарфлашди. Бу гуруҳдан Аргентина ва Нигерия плей-оффга чиқса керак.

- Ўйинда қайд этиладиган натижаларни тахмин қилиб кўринг.
- Гондурас  Швейцария - 2:3, Эквадор  Франция - 0:2, Аргентина  Нигерия - 1:1, Эрон - Босния ва Герцеговина - 0:1.

- Мавсумни қайси жамоада бошлашингиз бўйича бир қарорга келмадингнзми?
- Йўқ. Таклифлар етарли. Ҳал бўлиши билан бу ҳақда биринчилардан бўлиб championat.asia сайтига хабар бераман.


Камолиддин АЛИМОВ суҳбатлашди