Азамат Абдураимовнинг ўрнига Ўзбекистон ўсмирлар терма жамоасига янги бош мураббий тайинланди

Ўзбекистон U-16 терма жамоасига эндиликда ушбу ёш тоифасидаги футболчилар билан ишлашда катта тажрибага эга бўлган Олим Шокиров устозлик қилади.

Кеча ЎФA Мураббийлар кенгашининг йиғилиши бўлиб ўтди ва унда Ўзбекистон U-16 терма жамоаси бош мураббийи бўлишга номзодлар кўриб чиқилди. Мураббийлар кенгашининг тавсияси инобатга олинган ҳолда Олим Шокиров эндиликда Ўзбекистон U-16 терма жамоасида бош мураббий сифатида иш олиб боради. Шу пайтга қадар Ўзбекистон U-16 терма жамоаси мураббийлар штабида ишлаб келган мутахассислар ҳам фаолиятини давом эттиради – Сергей Aрсланов (катта мураббий), Тимур Ғаниев (дарвозабонлар мураббийи) ҳамда Жамшид Умаров (жисмоний тайёргарлик бўйича мураббий).

Шунингдек, Ўзбекистон ўсмирлар терма жамоаси мураббийлар штабида тажрибали мутахассислар – Ислом Aҳмедов ва Дилшод Нуралиев маслаҳатчи мураббий сифатида ўз тавсияларини бериб боришади.