Азамат Абдураимов: "Келажакда Осиёда биринчи бўлишимизга ишонаман"

Унга кўра Ўзбекистон миллий терма жамоаси бир поғона юқорилаб 48-ўринга чиқиб олди. Биз Ўзбекистон терма жамоаси собиқ ҳужумчиси Азамат Абдураимовнинг бу борадаги фикрлари билан қизиқдик.

"Албатта, терма жамоамизнинг ФИФА рейтингида юқорилаши ёқимли хабар. Биз дунёда кучли 50таликка кирганимиз Ўзбекистон ҳукумати ва Ўзбекистон футбол Федерацияси футболимиз ривожи учун катта иш қилаётганидан далолат бермоқда. Ўзбек футболи тўғри йўлда ва ривожланиб бормоқда".

Россияни ортда қолдирганимиз муҳим воқеа. Аммо нима учун будай бўлди? Бир томондан Ўзбекистон терма жамоаси Жаҳон чемпионати саралашида муваффақиятли иштирок этиб очколар тўпламоқда. Бошқа томондан Россия терма жамоаси мундиал мезбони бўлгани учун саралашда иштирок этмаяпти. Фақат ўртоқлик учрашувларида эса камроқ баллар берилади. Шу боис рейтингда юқорида турибмиз, аммо бу улардан кучли эканлигимизни англатмайди.

Ўйлашимча терма жамоамиз Осиё футболи етакчиларига қараб интилиши керак. Ахир биз Осиё қитъасидамиз. Қачон рейтингда қитъада биринчи бўлсак шунда юқори натижа бўлар эди. Бунга интилаяпмиз, шахсан мен келажакда Осиёда биринчи бўлишимизга ишонаман.

Шахсий фикримча, ФИФА рейтингига у қадар катта эътибор қаратиш керак эмас. Сабаби ғалаба ва олтин медалларгина терма жамоанинг асл кучини кўрсатиб беради. Агар Ўзбекистон терма жамоаси Россиядаги Жаҳон чемпионатига чиқса-ю ва рейтингда бошқа кўтарилмаса ҳам хурсанд бўлардим. Мундиалга чиқиш ҳақиқий натижа бўлади", - дейди 1994 йилги Осиё ўйинлари ғолиби Азамат Абдураимов.

Нарзулла Сайдуллаев