Audi Cup. Бугун Мюнхенда Европанинг топ-клублари тўқнаш келади

Ҳар йили янги мавсум олдидан ташкил қилинадиган турнирга "Бавария" мезбонлик қилади ва унда немис грандидан ташқари Европанинг яна 3 та жамоаси иштирок этади.

Бу сафар ушбу мусобақага Англиядан "Ливерпуль", Испаниядан "Атлетико" ва Италиядан "Наполи" таклиф қилинган. Audi Cup икки босқичдан иборат (ярим финал, финал).

Бугун турнирнинг ярим финал баҳслари бўлиб ўтади.

1 август

20:45. "Атлетико" - "Наполи" ("Альянс Арена")

23:30. "Бавария" - "Ливерпуль" ("Альянс Арена")

Ушбу учрашувлардан сўнг, финалда ва мусобақанинг 3-ўрни учун бўладиган баҳсда иштирок этадиган жамоалар номи маълум бўлади.

2 август

20:45. 3-ўрин учун баҳс

23:30. Финал

Жамоалар бир неча кун аввал Мюнхенга етиб келишган

Кеча тўрт жамоа мураббийлари иштирокида матбуот-анжумани бўлиб ўтди

Матбуот-анжуманида қизиқарли воқеа юз берди. Сўз навбати "Атлетико" устози Диего Симеонега келганида, унинг микрафони ишламай қолди. "Ливерпуль" бош мураббийи Юрген Клопп жойидан туриб, тезда ушбу муаммони бартараф этди ва ўзининг инженерлик маҳоратини кўрсатди.

Карло Анчелотти ("Бавария"): "Бу кучли жамоалар ўйнайдиган юқори савияли турнир. Ушбу баҳслар расмий ўйинлардан олдинги катта имтиҳон".

Юрген Клопп ("Ливерпуль"): "Бавария"га қарши баҳс биз учун ўзгача чақирув. "Бавария"га қарши баҳсда қандай ишлашимизни кўриш муҳим. Карло қандай таркибни майдонга туширишидан қатъий назар, бизга топ-даражадаги жамоа қаршилик қилади".

Диего Симеоне ("Атлетико"): "Аввалига нимага қодирлигимизни билиб олишимиз керак, кейин кўрамиз".

Маурицио Сарри ("Наполи"): Турнир бизга фойда келтириши мумкин. Бу ерда топ-жамоаларга қарши ўйнаймиз".