АПЛ. 17-тур натижалари ва мусобақа жадвали билан танишинг
16 дек 2019 08:08
Янгиликлар

АПЛ. 17-тур натижалари ва мусобақа жадвали билан танишинг

Англия Премьер-лигаси 17-тури деярли ортда қолди.

Бугун "Кристал Пэлас" - "Брайтон" учрашуви мазкур турни ёпиб беради. Ортда қолган "уик-энд" қизиқарли, кутилган ва кутилмаган воқеалари билан ёдда қолди. "Челси"нинг мағлуб бўлиши, "Лестер" ўз уйида "Норвич"ни енга олмагани қайсидир маънода сенсация сифатида қайд этилди. "Манчестер Юнайтед" ва "'Эвертон" жамоалари 1:1 ҳисобида дуранг ўйнашган бўлса, "Тоттенҳэм" сўнгги дақиқаларда "Вулверхэмптон" майдонида ғалабани илиб кетди.

Турнинг марказий ўйинда "Манчестер Сити" ярим ҳимоячи Кевин де Брюйненинг фантастик ўйини орқали "'Эмирейтс"да йирик ҳисобда ғалаба қозонди ва "тулкилар" билан орадаги фарқни 4 очкогача қисқартирди.

Айни вақтда "Ливерпуль" 49, "Лестер" 39, "Манчестер Сити" 35 очко жамғарган ҳолда АПЛда кучли учликни банд этишган. Кейинги ўринларда "уйғониш" даврини бошидан ўтказаётган жамоалар: "Челси", "Тоттенҳэм" ва "Манчестер Юнайтед" боришмоқда.

"Арсенал"да ишлар яхши эмас. Фредди Юнгберг ҳали бундай топ даражадаги клубни бошқаришга тайёр эмаслиги сезилиб қолмоқда. Балки яқин фурсат ичида "Манчестер Сити"да Пеп Гвардиола ёрдамчиси сифатида ишлаётган Микель Артетани "канонирлар" билан шартнома имзолаганини эшитиб қолармиз. Нима бўлганда ҳам, ҳозир лондонликлар ҳаммасини бошидан бошлашлари учун яхши бир мутахассис топишлари лозим.

Сўнгги поғоналарда "Уотфорд", "Норвич", "Саутгемптон" ва "Астон Вилла" клублари лигада жон сақлаб қолиш мақсадида кураш олиб боришмоқда. Улар ўтказган ўйинларидан ҳам кам очко тўплашган ва оғир вазиятда туришибди.

Ўтказилган 17-турдан кейин "Лестер" форварди Жэйми Варди 16 та гол билан тўпурарлар пойгасида яққол пешқадам бўлиб турибди. У яқин таъқибчиси Тэмми Абрахамдан "Челси" 5 та голга илгарилаб кетган. Қизиқ бир маълумотни айтинб ўтиш керак, 17-турда Вардига Fantasy Premier League да жуда кўпчилик ишонч билдиришганди (105 000 дан кўп инсон уч карра сардор, яъни гол урганда 3 баробар кўп очко берадиган "режим"ида Вардини танлашганди). Чунки, Варди 9-турдан бери кетма-кет голлар уриб жуда муҳим очколарини тақдим этган. Қаторасига 8 ўйинда 11 та гол ва 4 та ассист қайд этган футболчига ким ишонч билдирмаслиги мумкин?

Ассистлар бўйича "Манчестер Сити" аъзоси Кевин де Брюйне пешқадам — 10 та ассист. Иккинчи ўринда Сон Хён Мин (7 та) бораётган бўлса, кучли учликдан 6 тадан муваффақиятли узатма берган Александр-Арнольд ва Давид Силвалар ўрин олишган.