Анвар Бердиев: "Очиғи Абдураимовдан бундай ҳаракатни кутмагандим, у билан шартномани бекор қилдик"

Ўйин ҳақида

- Ўзбекистон аҳлини кириб келаётган Рамазон ҳайити байрами билан табриклайман. Шунақа ўйин бўлишини кутгандик. "Арал" жамоаси охиригача курашувчан жамоа. Кўп вазиятлардан фойдалана олмадик. Қимматли 2 очкони бой бердик.

- Бугунги очко йўқотилиши омадга боғлиқми ёки вазиятлардан фойдалана олмаслик биланми?

- Ҳаммавақт омад билан боғлаш ҳам тўғри бўлмайди. Омад кучлилар томонида бўлади. Вазиятга шай туриш керак.

- Бугун ҳар икки жамоа дарвозасига ҳам ўнг қанотдан ташкил этилган ҳужумлар гол билан якунланди. "Шўртан"да қанотлар қандай ишлади?

- Йигитлар имконият борича ҳаракат қилишди. Лекин хатолар ҳам учраб турди. Футбол 90 дақиқа бўлса, голлар сониялар ичида киритилади. Ўйиндан келиб чиққан вазиятлар бўлди.

- Жасур Холтўраевни захирага олиниши сабаблари ҳақида...

- Холтўраев ҳар икки бўлимда ҳам ҳаракат қилди, тер тўкди. Ҳужумчи майдонни голсиз тарк этишни истамайди. Биласизлар, у бизга Суперлигадан келиб қўшилган. Ундаги ҳолатни тушундим. Бошқа ҳужумчиларга ҳам имконият беришимиз керак.

- Таблода 88-дақиқа кетаётган вақтда бош ҳакам ўйинга 5 дақиқа қўшиб беришди. Сиз бу борада эътироз билдиргандек кўриндингиз...

- Йўқ, таблодаги вақтдан келиб чиқиб захира ҳакамига савол бердим. Айтишича, таблодаги вақт билан ҳакамлар ўйинни бошлаган вақтда фарқ юзага келган. Таблони эртароқ ёқиб қўйишган. Бу ўйинга таъсир кўрсатган деб ҳисобламайман.

- Дарвозабон Шерзод Абдураимовнинг ҳаракати юзасидан чора кўрилишини айтгандингиз. Бу жараён қандай кечаяпти?

- Очиғи Абдураимовдан бундай ҳаракатни кутмагандим. У тарбияли йигит эди. Тушунарсиз вазият бўлди. Буни оқламоқчи эмасмиз. Шундан келиб чиқиб у билан шартномани бекор қилдик.