Андрей Микляев: "Чемпионлик учун катта қадам ташланди, аммо..."

- Жамоадаги барча футболчиларга ғалаба учун раҳмат айтаман. Биз икки хил тайм гувоҳига айландик. Тезкор гол бизга бугун ёрдам берди. Бугун кўплаб имкониятларни голга айлантира олмадик. Ҳимояда ҳам баъзи хатоларга йўл қўйдик. Умуман олганда муҳим 3 очкони қўлга киритдик. Чемпионлик учун жуда катта қадам ташладик. Лекин охирги қадамни ташлаш жуда оғир бўлади. Чунки "Динамо" бугун ютди ва уларда элитада қолиш учун имконият пайдо бўлди. Демак бу ўз-ўзидан бизга Самарқандда жуда оғир бўлишини англатади.

Финишга яқинлашганда охирги қадам ташлаш доим оғир бўлади.

"Локомотив"нинг муваффақият сири нимада? Бизда аҳил жамоа йиғилган. Клуб ичида, жамоада ҳеч қандай низолар, келишмовчиликлар йўқ. Муҳит аъло даражада. Жамоада эҳтирослар бўлади. Бу футбол. Аммо жамоа ичида ҳеч қандай низолар бўлмайди. "Локомотив" бир оиладек. Ҳакамлар билан ҳам ҳеч қандай можаролар бўлмайди. Ҳаммаси рисоладагидек. Ҳакамлар бизнинг дарвозага ҳам, бизга ҳам пенальти беришади.

Кумуш медали кимга насиб этади? Айни пайтда ўйин жиҳатидан "Насаф" жуда кучли, улар ажойиб спорт формасида. Менга кўпроқ "Насаф" кўрсатаётган ўйин маъқул. Аммо бу футбол. Футболда ҳар нарса руй бериши мумкин. Битта алоҳида учрашувда исталган жамоага қарши ўйнаса бўлади. Шу боисдан ҳам ким иккинчи ўринни эгаллаши ҳақида бирор нарса дейиш мушкул.

Янги формат? ЎФФ раҳбарияти чемпионатимиз савиясини, ўйинлар сифатини ошириш учун ушбу қарорга келди. Менимча, бу формат чемпионатимиз кучайишига хизмат қилади. Сўнгги ўйинларда бораётган жамоаларни тушунаман. Лекин бу қарор эълон қилинганидан кейин охирги учрашувлар жуда қизиқарли ва кескин курашлар остида ўтмоқда.