“Андижон” ва “Навбаҳор” жамоаларида ўйнаган туркманистонлик Эльман Тагаев эсингиздами?

Бироқ, ярим ҳимоячининг ушбу жамоадаги фаолияти узоққа чўзилмади. Ёдингизда бўлса Тагаев 2016 йилнинг иккинчи даврасида Ориф Маматказин бошчилигидаги “Андижон” жамоасида ҳам маълум вақт тўп тепган, клуб қуйи лигага равона бўлгач у ҳам кетишга қарор қилганди. Шундай бўлсада иккинчи даврада 12та учрашувда майдонга тушган, мухлисларда ёмон таассурот қолдирмаганди.

Кейинчалик Озарбайжон чемпионатида ўзини кўрсатгач “лочинлар” сафига келиб қўшилганди. Наманганлик ишқибозлар ундан кўп нарса кутишгани рост, боиси ўз вақтида бу жамоада туркманистонлик мураббий Раҳим Қурбонмамедов ва бошқа туркман футболчилари яъни Дидар Хожиев, Давлетмурод Отаев кабилар билан ажойиб таркибни шакллантирганди. Хўш, Элман Тагаев нима учун клубдан кетди? Футболчи интервьюларининг бирида шундай изоҳ берган ва батафсил фикрларини билдириб ўтганди.

“Ҳозирда “Ахал” жамоасида ҳаракат қилмоқдаман. Ўз юртимга қайтиб фаолиятимни давом эттиришни мақул кўрдим. Наманганда кам ўйнаганимни сабаблари бор. Лекин, бу ҳақида кўп гапирмоқчи эмасман. Гап мураббийда эмас, Андрей Канчельскис яхши инсон. У билан ўртамизда ҳеч қандай зиддият ва келишмовчилик юзага келмаганди. Кетиш ўзимнинг шахсий қароримдир. Жамоани тарк этсам ўзимга ҳам, уларга ҳам қайсидир маънода фойда бўларди. Аммо, наманганлик ишқибозларни ёдимдан чиқармайман, улар Ўзбекистонда тенгсиз ва ягона. Сафарда ўйнаганимизга қарамай ажойиб муҳитни яратиб бера олишди. Инсон доим ўзи учун тўғри қарорни қабул қилиши керак деб ўйлайман.

“Андижон”ни ўша пайтда пайдо бўлган вазият сабабли тарк этганман. Бошқа изоҳга ҳожат йўқ. Янги футболчига мослашиши учун маълум бир вақт керак, у ердаги футболчилар, жамоа, шароитга тушиб олиши лозим. Мураббийнинг услуби ва талабларига мос келиш деган нарсалар ҳам бор”,- деганди ярим ҳимоячи.

Маълумот ўрнида 2019 йилги мавсумда у “Навбаҳор” сафида 3та ўйинда иштирок этди ва майдонда умумий ҳисобда 75 дақиқа ҳаракат қилди.