“Андижанка” БААда йиғин ўтказади

Жамоа 6 январдан янги мавсумга тайёргарликни бошлаб юборди. Машғулотлар Андижон шаҳридаги “Дўстлик” стадионида кунига икки маҳалдан олиб борилмоқда.

Юқорида айтиб ўтганимиздек, клуб раҳбарияти бу йил “Андижанка” олдига чемпионлик вазифасини қўймоқда. Шунга монанд шароитлар ҳам яратиб борилаётир. Клуб вице-президенти Маъруф Абдусаломовнинг айтишича, жамоа 28 январь куни хорижда йиғин ўтказиш учун сафарга жўнаб кетади. Бу борада БАА давлати танланган. Ўзингизга яхши маълумки, қиш фаслида БАА кўплаб клубларга тайёргарлик учун қулайдир. Январь ва феврал ойида мамлакатимизнинг бир қатор жамоалари ҳам айнан БААда йиғин ўтказиб қайтади. Шунингдек у ерда спарринг рақиблар топиш ҳам бирмунча осондир. Табиийки “Андижанка”нинг ушбу хориж йиғини Ўзбекистон аёллар футболида ўзига хос шов-шувли натижадир. Чунки бунга қадар асосан Қаршининг “Севинч” жамоаси чет элда машғулот ўтказиб қайтган.

Дарвоқе, “Андижанка” футбол клуби ўтган мавсум “Joma” фирмасининг спорт кийимларидан фойдаланганди. Клуб раҳбарияти узоқ изланишлардан сўнг машхур бренд “Nike” билан ҳамкорлик қилишни лозим топди ва бу борада мазкур фирма билан келишувга эришди. Шу боис жорий йил “Андижанка” ушбу фирманинг эпикировларидан фойдаланади.   

“Андижанка” ФК матбуот хизмати.