Александр Хомяков: «Ёзги йиғинни қандай ўтказганимизни иккинчи давра ўйинлари кўрсатиб беради»

- Александр Андреевич, мана жамоанинг ёзги йиғини ҳам якунланди. Ҳаммаси сиз ўйлагандек кечдими?

- Йиғинимиздаги охирги ўйинимизни ўтказдик. Режа бўйича йиғинни қай тариқа ўтказганимизни иккинчи давра ўйинлари кўрсатиб беради. Афсуски, селекция ишларимиз кўнгилдагидек кечмаяпти. Яна айрим позицияларни кўчайтиришимиз керак. Лекин ҳозирча буни иложи бўлмаяпти. Ҳали бироз вақт бор. Балки амалга ошиб қолар, агар имконини қилолмасак, шу ҳолатда ҳам ўз кучимизга эътибор қаратамиз.

- Шерзод Эсанов Россиянинг «Акрон» клубига трансфер қилинди. Унинг у ердаги имкониятини қандай баҳолайсиз ва футболчининг кетиши «Андижон» учун жиддий йўқотишми?

- Бу ўйинчининг потенциалидан келиб чиқиб, йўқотдикми-йўқми, келгуси ўйинларимиз кўрсатиб беради. Ҳозирдан тахмин билдира олмайман. Унинг келгуси фаолиятига омад тилайман. Менинг қарашимча, асосий таркибни аниқлаб олиш осон бўлмаяпти. Лекин мен ҳозирги йигитларга ишонаман, улар ишончни оқлашади.