АГМК ёшлар жамоаси бугун Биринчилик ғолиблигини расмийлаштириши мумкин

 Бу ўйиндаги эҳтимолий ғалаба жамоани Ёшлар Биринчилиги ғолибига айлантириши мумкин.

Бунинг учун параллель равишда бўладиган Муборакдаги "Машъал" (U21) - "Насаф" (U21) учрашувида мезбонлар ютқазмаслиги талаб этилади. Агарда бугун АГМК (U21) жамоаси ғалабани тантана қилиб, "Машъал" (U21) ўз ўйинида мағлубиятга учрамаса, унда олмалиқлик ёшлар муддатидан аввал чемпионликни расмийлаштиради.

АГМК футбол клуби тарихида ҳали ёшлар жамоаси Биринчилик ғолибига айланмаган ва жорий мавсум ушбу тарихий воқеа юз беришга жуда яқин.

АГМК футбол жамоаси ҳар йили юксалиш ва ривожланиш йўлида турли ғалабалар ва тарихий натижалар қайд этаётгани бежизга эмас. Чунки тўғри йўлга қўйилган клубнинг ички сиёсати ва пастки бўғинга қаратилаётган эътибор натижаси ўз мевасини бериш жараёнида. Бу эса босқичма-босқич жамоани буткул янги даражага чиқиши учун хизмат қилиши шубҳасиз.

Аъзам Шерғозиев бошчилигидаги АГМК (U21) жамоаси йил давомида катта кўламдаги ишларни бажариб, ҳозиргача ўтказилган 20 ўйиндан 15тасини ғалаба билан якунлаган. Бугунги "Бунёдкор" (U21) билан бўладиган баҳсда қўлга киритилиши мумкин бўлган эҳтимолий 16-ғалаба уларни чемпионлик сари етаклаши мумкин.

Ёшлар Биринчилиги, 21-тур.

1 октябрь, жума.

"Бунёдкор" (U21) - АГМК (U21) (16:30)

"Бунёдкор" академияси майдони.