Абрамовга 11та ўйин керак бўлди
02 окт 2017 11:22
Янгиликлар

Абрамовга 11та ўйин керак бўлди

Ниҳоят Фарғонанинг "Нефтчи" клуби Вадим Абрамов қўл остида ўзининг илк ғалабасини нишонлади.

Олий лиганинг 23-турида фарғоналиклар "Олмалиқ" меҳмони бўлиб, 2:1 ҳисобида зафар қучишди. Ўйинда Музаффар Музаффаровнинг иккита голи фарғоналикларга ушбу мавсум ҳисобидан учинчи ғалабани тақдим этди.

Бунгача "Нефтчи" ўз майдонида "Обод"ни ва сафарда "Сўғдиёна"ни мағлуб этганди. Лекин бу иккала ғалаба Андрей Фёдоров даврида қўлга киритилганди. Жамоага Вадим Абрамов бош мураббий бўлганидан кейин эса "Нефтчи" "Олмалиқ" билан кечган баҳсда илк ғалабасини нишонлади.

Бунинг учун Вадим Карленовичга 11та ўйин керак бўлди. Аввалги ўнта баҳснинг олтитасида фарғоналиклар ютқазиб, тўрт марта дуранг қайд этишганди. Дарвоқе, "Нефтчи" иккинчи давра бошланганидан бери биринчи бор рақиб дарвозасига биттадан кўп тўп кирита олди.

Ҳавола :

Манба : championat.asia

Янгиликларни Телеграмда ўқинг!

Рейтинг: +11