Абдумавлон Абдужалилов: "Омаднинг тагида катта меҳнат ётибди"

Бир неча кун Суперлига доирасида "Бухоро" билан куч синашган "Бунёдкор" кеча кубок учрашувида ҳам ўзаро тўқнаш келди. Ўйиндан сўнг "қалдирғочлар" дарвозасини қўриқлаган Абдумавлон Абдужалиловнинг фикрларини тингладик. 

- Бу ғалабани омадга қиёслаш тўғрими?

- Бир томондан омадга ҳам боғлиқ. Лекин бунинг тагида катта меҳнат ётибди. Бир киши кам бўла туриб 45 дақиқа ҳимояландик. Сабр қилиб, мураббийимизнинг кўрсатмаларини бажарганимиз учун охирги дақиқада ғалаба қозондик десам ҳам бўлади. Биринчи бўлим охирида бир киши кам бўлиб қолдик. Бу ҳам яхшиликка экан якунда ўзимиз истаган натижага эришдик дея оламан. 

- "Бунёдкор" орқада камроқ хато қилиб олдинда вазиятлардан максимал фойдаланяпти. Бу жамоанинг фалсафасига айландими?

- Ўтган йилга нисбатан ўйин услубимиз ўзгарган. Тўпни кўпроқ назорат қилишга ҳаракат қиляпмиз. Бунга мос футболчилар жамоамизда кўп. Замонавий футболда ҳимояланишни ҳам, ҳужум қилишни ҳам билиш керак. Тарозининг икки палласи каби баланс зарур. Олдинда бунданда қийин ўйинлар бор. Худо хоҳласа ўзимизнинг кучимизни кўрсатишга интиламиз.