3 та голга ассистентлик қилган футболчи, рақибни тор-мор келтирган мураббий, 22 ёшли посбон — Суперлигада 20-турнинг энг яхшилари​

Championat.asia сайти талқинига кўра 20-турнинг энг яхши дарвозабони – Отабек Боймуродов ("Бухоро")

"Бухоро" бу турда "Қўқон-1912" билан баҳс юритиб, 1:0 ҳисобида ғалаба қозонди. Шубаҳсиз, бу ғалабада бухороликлар дарвозабони Отабек Боймуродовнинг ҳиссаси катта. У баҳс мобайнида нафақат сэйвлари билан ажралиб турди, балки бирга-бир ҳолатда ҳам жамоасини муқаррар голдан қутқариб қолди. Шу тариқа, Championat.asia сайти 22 ёшли посбонни 20-турининг энг яхши дарвозабони деб топди. 

Championat.asia сайти талқинига кўра 20-турнинг энг яхши мураббийи – Камолиддин Тожиев ("Пахтакор")

"Пахтакор" ортда қолган турда Андижонга сафар уюштириб, 6:2 ҳисобидаги ғалабани расмийлаштирди. "Шерлар" ҳар икки бўлимда 3 тадан кўп киритгани таҳсинга сазовор. 65-дақиқада Ҳожиакбар Алижонов майдондан четлатилганига қарамай, жамоа 3 та гол урди – бунда бош мураббий захирадан туширган ўзгаришларнинг барчаси меҳмонларга қўл келди. Шундай қилиб, Камолиддин Тожиев Championat.asia талқинида турнинг энг яхши мураббийи сифатида эътироф этилди. 

Championat.asia сайти талқинига кўра 20-турнинг энг яхши футболчиси – Хуршид Ғиёсов (ОКМК)

ОКМК бу тур ўз уйида "Хоразм" устидан ишончли ғалабага эришди – 3:1. Баҳс олмалиқликлар вингери Хуршид Ғиёсовнинг бенефисига айланиб кетди. 30 ёшли футболчи барча голларда моҳирона тарзда ассист вазифасини бажарди. Тур футболчиси бўлиш учун Ҳожимат Эркинов (1 та гол ва 2 та голли узатма) жиддий рақобат туғдирди, бироқ якунда сўровномада барибир Ғиёсов устунликка эришди. Шу тариқа, Хуршид Ғиёсов Championat.asia талқинида 20-турнинг энг яхши футболчиси бўлди.

Championat.asia сайти талқинига кўра 20-турнинг энг чиройли голи муаллифи – Маҳмуд Маҳамаджонов ("Динамо")

"Динамо" бу тур меҳмонда "Сўғдиёна" билан муроса кўчасини танлади. Учрашувдаги ҳисоб 29-дақиқада самарқандликлар ҳимоячиси Маҳмуд Маҳамаджонов томонидан очилди. Дастлаб Ҳожимирзаев зарба йўллади, уни Митрович қайтаргач, тўп Маҳмудга етиб келди. Қанот вакили ўзининг чап оёқдаги кучли зарбаси билан тўпни дарвозанинг тепа бурчагига шунчаки "михлаб қўйди". Шу тариқа, Маҳамаджонов Championat.asia сайти талқинига кўра, турнинг энг чиройли гол муаллифи деб топилди.