Эътибор бераётган бўлсангиз, охирги йилларда Суперлига географияси кенгайган ҳолда барча вилоятларни ўз ичига қамраб олмоқда. "Хоразм"дан сўнг мана Қорақалпоғистонга ҳам Суперлига ҳавоси кириб келди. "Арал" ярим ҳимоячиси Фарҳод Бекмуратов фикрларимизга қўшилган ҳолда ўзининг таассуротлари билан ўртоқлашди.
— Барча футбол мухлислари номидан "Aрал" жамоасининг Суперлигага чиққани билан табриклаймиз! Ушбу тарихий муваффақиятдан сўнг таассуротларингиз қандай?
— Табрик учун катта раҳмат! Таассуротлар ростдан ҳам бир олам. Энг асосий мақсадимизга эришганимиздан жуда ҳам хурсандман. Чорак асрлик — 25 йиллик танафсусдан сўнг яна элитага қайтган "Арал" жамоасининг барча фидойи мухлисларини ушбу муҳим муваффақият билан чин қалбимдан табриклайман!
— Бу йилги Про-лига баҳслари ва ундаги рақобат даражаси ҳақида нима дея оласиз? Мавсум кутилганидек осон кечмаётгани аниқ...
— Ҳа, бу йилги Про-лига жуда қизиқарли ва шиддатли ўтмоқда. Турнир жадвалининг пастки поғоналарида бораётган жамоалар ҳам юқоридаги пешқадамларга жиддий қаршилик кўрсатишмоқда. Ҳар бир жамоа, айниқса, иккинчи даврада ҳар бир очко учун майдонда бор кучи билан ҳаракат қилди.
— Жорий мавсум бошида фаолиятингизда кутилмаган бурилиш бўлди. Қирғизистон чемпионатига йўл олгандингиз, аммо кейинчалик яна “Арал”га қайтдингиз. Бу жараён қандай кечди?
— Тўғри таъкидладингиз. Йил бошида Максим Шацкихнинг таклифига биноан Қирғизистоннинг ёки “Азиа Талас” жамоасига ўтган эдим. Ҳаммаси жуда яхши бошланганди, аммо ўртада жароҳат олиб қолдим ва 1 ой даволанишимга тўғри келди.
Шундан сўнг майдонга қайтганимда 1-давра якунланган эди ва кетшга қарор қилдим. Шу орада “Арал”дан таклиф бўлди ва уни қабул қилдим. Бу қароримдан асло афсусланмайман, чунки бу ерга келиб, клубнинг қанчалик ривожланаётганини ўз кўзим билан кўрдим. Муҳтарам Президентимиз келиб, “Турон” стадионини очиб бергани ҳам муҳим омил бўлди.
— Бу сизнинг Про-лигадан Суперлигага чиқиш бўйича ягона тажрибангиз эмас. Илгари ҳам шундай натижага эришгансиз...
— Ҳа, тўғри айтдингиз. 2018 йилнинг бошида "Локомотив" билан бирга эдим, 2-даврада эса "Андижон"га қайтганман. Ўшанда ҳам Про-лигадан Суперлигага чиқиш учун бор куч-ғайратимизни сарфлаганмиз. Натижада жамоамиз 2018 йилги Про-лига чемпиони бўлиб, Суперлига йўлланмасини қўлга киритган эди.
Фурсатдан фойдаланиб, “Арал”нинг элитага чиқишида катта ҳисса қўшган клубимиз ҳомийларига, раҳбариятга, мураббийлар штабига ва, албатта, Қорақалпоғистон Республикаси Жўқорғи Кенгеси Раиси Орынбаев Аманбай Тлеубаевичга ўз миннатдорчилигимни билдириб қоламан. Бу йўлда барча бир ёқадан бош чиқарди.
