ЖЧ-2014. Мундиал иштирокчилари - Коста-Рика

Коста-Рика терма жамоаси мундиалдаги ўзининг илк иштирокини 1990 йилда бошлаган.  Айнан ўша жаҳон чемпионатида Коста-Рика гуруҳдан чиқиб, 1/8 финал босқичигача етиб борган эди. Шундан сўнг Коста-Рикада авлоджлар алмашуви юзага келади ва терма жамоаси навбатдаги иккита чемпионатни ўтказиб юборишади. 2002 йилда Жанубий Корея ва Японияда бўлиб ўтган Жаҳон чемпионатида ҳам йўлланма олишган эди. Лекин бу сафар уларга гуруҳдан чиқиш насиб этмаган. Кейинги Германияда ўтказилган сайёрамизнинг энг кучли футбол мусобақасида ҳам қатнашишган. Аммо гуруҳ босқичидаги барча ўйинларда рақибларига имкониятни бой беришган. 



Навбатдаги ЖАРда ўтказилган мундиалда Коста-Рика иштирок этмаган. Жаҳон чемпионати саралаш босқичида КОНКАКАФ минтақасида тўртинчи ўринни олишган ва плей-оффда Уругвай билан куч синашишган. Коста-Рика Уругвай қаршилигини енга олишмаган ва ЖАРдаги чемпионатни ўтказиб юборишга мажбур бўлишган эди.

Коста-Рика ҳозиргача уч бора мундиалда қатнашган ва Бразилияда бўлиб ўтадиган Жаҳон чемпионати  улар учун тўртинчиси ҳисобланади.



Коста-Рика КОНКАКАФ чемпионатида уч бора ғолибликни қўлга киритган.

Бу терма жамоа сафида бир қатор кучли футболчилар тўп тепишган. Коста-Рика футболида Алешандре Боржис Гимараес, Роналд Гомес, Пауло Ванчопе, Уинстон Паркс, Хосе Поррас, Эрнан Медфорд, Вальтер Сентено, Роландо Фонсека каби таниқли чарт тўп усталари етишиб чиқишган.



Айни пайтда жамоани Колумбиялик Хорхе Луис Пинто бошқариб бормоқда. Жамоа таркибида юлдуз футболчилар йўқ. Коста-Рика асосий эътиборини жамоавий ўйинга қаратади. Луис Пинтонинг ҳимоявий ўйин услубидан кўра, ҳужумкор футболни яхши кўрадиган мутахассислардан ҳҳисобланади. Шу боис Коста-Рика кўпроқ очиқ футбол кўрсатмоқда. Улар учун Бразилияда бўлиб ўтадиган мундиал катта тажриба мактабини ўтаб бера ажаб эмас. Сабаби, улар ўлим гуруҳи номини олган "D" гуруҳидан жой олишган. Италия, Англия ва Уругвайга қарши беллашиш уларга осон бўлмаслиги аниқ. Коста-Риканинг асосий мақсади бу ушбу мундиалда муносиб иштирок этишдир. Коста-Рикалик мухлисларни гуруҳ босқичидаёқ учта финалга тенг катта учрашувлар кутиб турибди. Футбол байрами улар учун ҳам қийин ва жуда мароқли ўтади десак муболаға бўлмайди. Бу каби терма жамоаларга қарши ўйинларда улар финал баҳсига тушгандек катта иштиёқ билан ҳаракат қилишади. Агарда мўъжиза руй бермаса, Коста-Рика гуруҳдан чиқа олмайди. Аксинча бўлса, унда Коста-Рикани бемалол мусобқада фаворитлари сафига қўшиб қўйиш ҳам мумкин бўлади.



Коста-Рика терма жамоаси ҳақида:

Ташкил топган йил: 1921
Бош мураббий: Хорхе Луис Пинто
Жамоа сардори: Брайан Руис
Энг кўп ўйин ўтказган футболчи: Вальтер Сентено (137 ўйин)
Энг яхши тўпурар: Роландо Фонсека (47 гол)
ФИФА рейтингидаги ўрни: 34
Илк ўйин: Коста-Рика - Сальвадор 7:0 (1921 йил)
Энг йирик ғалаба: Коста-Рика - Пуэрто-Рико 12:0 (1946 йил)
Энг йирик мағлубият: Мексика - Коста-Рика 7:0

Эришган ютуқлари:
КОНКАКАФ чемпиони: (1963, 1969, 1989)



Дарвозабонлар: Кейлор Навас ("Леванте", Испания), Патрик Пембертон ("Алахуэленсе"), Даниэль Камбронеро ("Эредиано").

Ҳимоячилар: Жонни Акоста ("Алахуэленсе"), Жанкарло Гонсалес, Вэйлон Фрэнсис (иккиси - "Коламбус", АҚШ), Хайнер Мора, Майкл Умана (иккиси - "Саприсса"), Хуниор Диас ("Майнц", Германия), Кристиан Гамбоа ("Русенборг", Норвегия), Рой Миллер ("Нью-Йорк Ред Буллз", АҚШ), Оскар Дуарте ("Брюгге", Бельгия).

Ярим ҳимоячилар: Сельсо Борхес (АИК, Швеция), Кристиан Боланьос ("Копенгаген", Дания), Оскар Эстебан Гранадос, Хосе Мигель Куберо (иккиси - "Эредиано"), Майкл Баррантес ("Олесунн", Норвегия), Ельцин Техеда ("Саприсса"), Диего Кальво ("Волеренга", Норвегия).

Ҳужумчилар: Брайан Руис (ПСВ, Голландия), Жоэль Кэмпбелл ("Олимпиакос", Греция), Рэндалл Бренес ("Картагинес"), Маркоc Уренья ("Кубань", Россия).



Шаҳбоз Беғамов тайёрлади.