Ёзда "Реал" либосини кийиши кутилаётган футболчилар

Флорентино Перес катта трансферларни амалга оширишга шайланган. Қуйида "қироллик клуби" кўзлаган "ўлжалар" борасида сўз юритамиз. 

Киран Тирни ("Арсенал")

"Селтик”дан "Арсенал"га ўтганидан сўнг у тезда жамоанинг асосий футболчисига айланди. "Тўпчилар" ҳимоясида ишончли ўйнилари орқали кўплаб кучли клублар назарига тушди. Жумладан, "Реал" ҳам ёзда уни ўз таркибига қўшиб олишни мақсад қилган. Мадридликлар ҳимояда юзага келаётган муаммоларни Тирни орқали беркитишмоқчи. 

Шотландиялик футболчи Европа Чемпионлар лигасида ўйнаш борасида тажрибага эга бўлмаса-да, аллақачон дунёнинг энг тезкор лигаси бўлмиш АПЛда ўзини намоён этишга улгурди. 

Пау Торрес ("Вильярреал")

Ўтган ёзда Торресга АПЛнинг кўплаб етакчи жамоалари томонидан жиддий таклифлар келиб тушганди. "Тоттенхэм" Пауни сотиб олиш бўйича жиддий таклиф билан чиқди. Диққат қилинг, 60 млн евро(!). Бироқ Торрес "Вильярреал" билан Чемпионлар Лигасида ўйнаш истагини билдириб, "сариқ сувости кемаси"да қолганди. Эндиликда "Реал" ҳимоядаги ишончли ўйинларидан келиб чиқиб, уни ўз сафига қўшиб олмоқчи. 

Антонио Рюдигер ("Челси")

Антонио Рюдигер "Челси" билан янги шартнома имзолашдан воз кечган ва ёзда "Стэмфорд Бриж"дан кетиши мумкин.

Кристенсен ва Рюдигернинг шартномалари 2022 йилда тугайди. Кристенсен "Барселона"га ўтишга тайёр.

Мадридликлар эркин агент сифатида келаётган Рюдигерни дунёдаги энг яхши маош олувчи ҳимоячилардан бирига айлантириши мумкинлиги ҳақида миш-мишлар бор. Ўз навбатида, германиялик футболчи ҳам юқори маош таклиф қиладиган жамоалардан бирида тўп тепмоқчи. 

Поль Погба ("Манчестер Юнайтед")

Поль Погба кўп йиллар давомида "Реал Мадрид" билан бевосита боғлаб келинади. Айниқса, у "қироллик клуби"да тўп тепиш истагини билдиргач, музокаралар янада авж паллага кирган.

"Реал" ёзда "қизил иблислар" сафини тарк этиши кутилаётган франциялик футболчини қўлга киритишга уриниб кўради. Ўз ўрнида, "Реал" Погба бўйича "Ювентус" билан беллашишига тўғри келади. Туринликлар собиқ футболчисини ортга қайтариш бўйича асосий даъвогарлардан бири бўлиб туришибди. 

Орельен Тчуамени ("Монако")

Орельен Тчуамени жадаллик билан ўсиб келаётган иқтидорли футболчилардан бири ҳисобланади. Куч, тезлик, дриблинг маҳорати жойида бўлган футболчини ёзда сотиб олиш бўйича кўплаб таклифлар келиб тушган. Жумладан, "Реал Мадрид" у учун етакчи даъвогарлардан бири.

"Монако" Тчуаменини сақлаб қола олмаслиги тахмин қилинмоқда. 22 ёшли футболчининг истиқболини инобатга олиб, Франция клуби қаҳрамонимизни сотиб юборишни режалаштирмоқда. 

Эрлинг Холанд ("Боруссия Д")

Сўнгги икки йил давомида "Реал Мадрид" Холандни сотиб олиш борасида кўплаб таклифлар билан чиқмоқда. 

Перес Холанд трансфери бўйича бор кучини сафарбар қилган. Маблағ топиш учун катта миқдорда кредит олишга ҳам тайёр. "Реал" хаттоки очкўз Мино Райоланинг юқори бўлган коммисиясини тўлашга-да тайёр. Холанд ҳам фаолиятини доимий равишда совринларга эга чиқадиган жамоада давом эттирмоқчи. 

Килиан Мбаппе (ПСЖ)

Килиан Мбаппе 2022 йилнинг ёзида эркин агент сифатида "Реал"га ўтиши мумкин. Клуб бир йил олдин франциялик футболчини қўлга киритишни шунчалик орзу қилганки, 200 миллион евролик таклиф юборган. 

Бироқ ПСЖ ҳам доимий равишда бу келишувга тўсиқ бўлиб келмоқда. Мбаппе эса парижликлар билан янги шартнома имзолашдан бош тортмоқда. Бироқ Переснинг бу галги юриши ўзини оқласа керак.

Самандарбек таржимаси