АГМК: Йиғин доирасидаги назорат ўйинлари сарҳисоби
24 фев 2020 16:11
Новости

АГМК: Йиғин доирасидаги назорат ўйинлари сарҳисоби

Теги : АГМК

АГМК жамоаси янги 2020 йилги мавсумга тайёргарлик олиб борди.

Жамоа дастлаб ўтган йил якунида, яъни 24 декабрь куни тўпланиб, янги йилга қадар 5 кунлик йиғинни ўтказганди. Сўнгра жамоа футболчиларига янги йил байрами туфайли 4 кунлик кичик таътил берилиб, жамоа 2020 йилдаги илк йиғинини 3 январдан яна тиклаганди. Машғулотлар асосан Дўрмондаги қароргоҳда ва Қибрайдаги стадионда олиб борилди. 9 январда эса жамоа аъзолари тиббий кўрикдан ўтишгани боис, уларга 1 кунлик ҳордиқ чиқариш учун дам берилди. Шунингдек, йиғиннинг дастлабки қисмини Қибрайда ўтказган жамоа 18-19 январь кунлари ҳам қисқа таътилга чиқди. Кейинчалик яна бир ҳафталик йиғин Қибрайда давом эттирилди ҳамда бу орада иккита назорат ўйини ўтказилди. Дастлаб "Оқ-тепа" йирик ҳисобда мағлуб этилган бўлса, кейинчалик "Сурхон" устидан ғалаба қозонилди. Шундан сўнг жамоа 1 кунлик таътилга чиқди ва 27 январь куни Тошкент-Дубай йўналиши бўйича парвоз қилиб, мавсумга тайёргарлик қисмининг асосий босқичини БААда давом эттирди. 2 ҳафталик йиғин доирасида жамоа қатор кучли спарринг рақиблар билан назорат учрашувларини ўтказди. Аввалига Туркманистон миллий терма жамоаси билан, кейинчалик Хитой Суперлигаси вакиллари - "Циндао Хуанхай", "Шаньдун Лунэн", "Шанхай СИПГ" каби номдор жамоаларга қарши учрашувлар бўлиб ўтди.

АГМК Туркманистон миллий терма жамоаси ва "Циндао Ҳуанхай" устидан ғалаба қозонган бўлса, "Шаньдун Лунэн" ҳамда "Шанхай СИПГ"га мағлуб бўлди. "Шанхай СИПГ"га қарши иккинчи назорат беллашувида томонлар муроса кўчасини танлашди. Шу тариқа АГМК 11 февраль куни БААдаги ўқув-машғулот йиғинини якунлаб, Тошкентга қайтиб келди.

Сўнгра футболчиларга 2 кунлик таътил берилгач, жамоа 14 февралдан эътиборан Дўрмондаги қароргоҳда тўпланди ва янги мавсумга тайёргарлик қисмининг якуний босқичини юртимизда давом эттирди. Мазкур йиғин доирасида жамоа аввалига "Аҳмад Яссавий" стадионида Про-лига вакили "Рубин"га қарши назорат беллашуви ўтказди. Йиғин доирасидаги сўнгги назорат баҳси эса Олмалиқдаги асосий ўйингоҳ ОКМК спорт мажмуаси майдонида "Оқ-тепа"га қарши бўлиб ўтди. Мазкур ўйинларда ҳам жамоа ишончли ғалаба қозониб, янги мавсум стартига яхши кайфиятда йўл оладиган бўлди.

Йиғин доирасидаги назорат ўйинларини сарҳисоб қиладиган бўлсак, жамоа жами 9та учрашув ўтказди ҳамда 6 ғалаба, 1 дуранг ва 2 мағлубият қайд этди. Тўплар нисбати: 18-7. Ўтказилган 9 назорат учрашувининг 4тасида жамоа ўз дарвозасини даҳлсиз сақлади ва 2 ўйинда майдонни голсиз тарк этди.

АГМК сафида 2020 йилги қишки ўқув-йиғин машғулот доирасида гол киритган футболчилари рўйхати:

1. Мате Ватсадзе - 3

2. Шаҳзод Нурматов - 3

3. Санжар Турсунов - 2

4. Элгужа Григалашвили - 1

5. Сайдулло Раҳматов - 1

6. Арслонмират Аманов - 1

7. Сардор Раҳмонов - 1

8. Бобур Йўлдошев - 1

9. Хожимат Эркинов - 1

10. Миржамол Қосимов - 1

11. Баҳром Абдурахимов - 1

12. Зафар Полвонов - 1

Ассистент ва самарали ҳаракатлар бўйича рўйхат қўйидагича:

1. Хожимат Эркинов - 3 (1 ассист, 2та пенальти)

2. Элгужа Григалашвили - 2

3. Шаҳзод Нурматов - 2

4. Арслонмират Аманов - 1

5. Санжар Турсунов - 1

6. Мурод Тошматов - 1

7. Йован Жокич - 1

8. Миржамол Қосимов - 1

9. Сайдулло Раҳматов - 1

Маълумот ўрнида, АГМК янги мавсумдаги илк баҳсни Суперлига 1-тур доирасида Олмалиқда Тошкент вилояти дербиси мақомида Бекободнинг "Металлург" жамоасига қарши ўтказади. Ўйин 29 февраль куни соат 16:45да бошланади.