Transfermarkt ва Championat.Asia ой лауреатларини аниқлади

Сўровномада Championat.Asia ишчи ходимлари, Transfermarkt порталининг русча тахририяти раҳбари Георгий Лекарев ва таклиф қилинган эксперт Отабек Жўраев иштирок этди.

Унга кўра, Суперлиганинг ой мураббийи сифатида Александр Хомяков тан олинди. Унинг қўл остида "Бухоро" ўз тарихидаги энг яхши стартни амалга оширди ва дастлабки 4 ўйинда 10 очко жамғарди. Хусусан жамоа "Навбаҳор", "Динамо" каби жамоаларни мағлубиятга учратди. У 47 фоиз овоз тўплади. Иккинчи ўринни 31 фоиз овоз билан Ислом Исмоилов эгаллади.

Ой футболчиси сифатида "Нефтчи" ҳужумчиси Стипе Перица эътироф қилинди. "Удинезе", "Стандард", "НАК Бреда" ва "Уотфорд" каби жамоаларнинг собиқ форварди миллий чемпионатимизда бирданига юқори даражасини намойиш қилди. 30 ёшли ҳужумчи 4 ўйинда 4 гол урди ва унинг голлари сабабли жамоа пешқадамлик қилмоқда.

Перица овоз бериш жараёнида 31 фоиз овоз тўплади. "Бухоро" кипери Умид Ҳамроев (4 ўйин, 2 ўтказиб юборилган гол ва 2 қуруқ ўйин) ҳамда "Нефтчи" ярим ҳимоячиси Жамшид Искандеров (4 ўйин 1 гол ва 3 ассист) 26 фоиздан овоз тўплаб, иккинчи ва учинчи ўринларда қайд этилди.