Январь ойида амалга ошиши мумкин бўлган 25 трансфер

Январь ойи бутун Европадаги футбол клублари учун трансфер ойнаси очилиши ва олди-сотдиларни амалга ошириш учун муҳим давр ҳисобланади.

Мавсум ўртасида кўплаб ўйинчилар ўз позицияси мос келадиган жамоаларга эътибор қаратишади, клублар эса ўз таркибларини кучайтиришга интилишади.

Келинг, январь ойида амалга ошиши мумкин бўлган энг яхши 25 та трансферни кўриб чиқамиз.

Кристиан Пулишич (Челси)

Ўз вақтида "Ажабтовур йигит" номи билан танилган америкалик футболчи Кристиан Пулишич 2019 йилда "Челси"га ўтганидан бери ёрқинлиги пасайгандек кўринмоқда.

У доимий жароҳатлар билан курашиб келмоқда, бу эса футболчига ҳар доим барқарор ўйин намойиш этишга тўсқинлик қилмоқда. Ҳозирда бир қатор гранд жамоалар ярим ҳимоячини кузатиб боришмоқда.

Килиан Мбаппе (ПСЖ)

Агар парижликлар янги шартнома бўйича келишувга эриша олмасалар, Килиан Мбаппе ушбу ёзда эркин агентга айланади.

Мадриднинг "Реал" клуби франциялик жаҳон чемпиони билан шартнома имзолаш истагида, аммо ёзда уларнинг таклифи рад этилди. ПСЖ футболчини текинга қўйиб юборишни истамаса, январда шартнома ёки трансфер борасида жиддий шуғулланиши лозим.

Кристиан Эриксен (эркин агент)

Кристиан Эриксен "Интер" билан шартномани бекор қилгандан сўнг эркин агент саналади ва ўзига янги клуб изламоқда.

Даниялик футболчи юрагига ўрнатилган дефебилатор қурилмаси туфайли Италияда ўйнай олмайди. Хабарларга кўра, футболчи АПЛга қайтиши мумкин, аммо "Аякс" ярим ҳимоячи учун потенциал мақсад сифатида эътироф этилмоқда.

Аарон Рэмзи (Ювентус)

"Арсенал" собиқ ярим ҳимоячиси Аарон Ремзи "Ювентус"ни тарк этмоқчи, футболчига Патрик Виейра бошқарувидаги "Кристал Пэлас" клуби қизиқиш билдирмоқда. Уэльс терма жамоаси футболчиси Премьер-лигага қайтиши кутилмоқда ва "канонирлар" ҳам ўзларининг собиқ юлдузларидан бирига "оғиз солиб кўриш"и мумкин.

Антони Марсиал (Манчестер Юнайтед)

"Манчестер Юнайтед" ҳужумчиси Антони Марсиал "Олд Траффорд"ни тарк этмоқчи эканлигини ва агар агенти рози бўлса, январь ойида жамоани тарк этиши мумкинлигини айтди.

Франциялик футболчи "қизил иблислар" асосий таркибидан жой эгаллай олмаяпти ҳамда ўз карьерасини бошқа клубда, "Ньюкасл Юнайтед", "Ювентус" ёки "Севилья"да давом эттириши мумкин.

Деле Алли (Тоттенхэм)

Деле Алли "Тоттенхэм"даги фаолиятининг дастлабки даврида Премьер-лигада бўрон сингари майдонда кезди, аммо сўнгги йилларда жароҳатлар ўз таъсирини ўтказди. Бир вақтлар келажаги порлоқ дея эътироф этилган ҳужумкор ярим ҳимоячига "Эвертон" ва "Вест Хэм" қизиқиш билдирмоқда.

Поль Погба (Манчестер Юнайтед)

Франция терма жамоаси билан жаҳон чемпионати ғолиби бўлган ва барча даврларнинг энг қиммат футболчиларидан бири ҳисобланадиган Поль Погба "Манчестер Юнайтед"даги ўрнини топа олмаяпти ҳамда клубни тарк этиши мумкинлиги ҳақидаги миш-мишлар тобора кучаймоқда. Унинг шартномаси шу ёзда якунланади, ярим ҳимоячига "Ювентус" даъвогарлик қилмоқда, аввалроқ "Реал Мадрид" ҳам қизиқиш билдирганди.

Эрлинг Ҳоланд (Боруссия Дортмунд)

Ҳозирда дунёнинг энг яхши ёш ҳужумчиларидан бири Эрлинг Ҳоланд кўплаб топ-клубларнинг рўйхатида.

"Манчестер Сити" ва "Манчестер Юнайтед" ушбу пойгада пешқадамлик қилмоқда, бироқ "Челси" ҳам улардан қолишгани йўқ. Дортмунднинг "Боруссия" клуби эса Холандни катта миқдордаги суммада пулламоқчи, шу боис уни январда сотиб олиш бўйича ҳаракатлар ёзгача чўзилиши мумкин.

Пьер-Эрик Обамеянг (Арсенал)

Пьер-Эмерик Обамеянг 2021-22 йилларда "Арсенал" сардори бўлган, бироқ Микель Артета интизомий қоидабузарлик туфайли уни ушбу боғичдан маҳрум қилди. Энди у "Эмирейтс"ни тарк этиши мумкин.

Хабарларга кўра, "Барселона" ҳужумчига қизиқиш билдирмоқда, аммо Каталония клуби билан келишув қандай якун топиши номаълум. Яқинда миллиардер клубга айланган "Ньюкасл Юнайтед" ҳам габонлик форвардни қўлга киритишни мақсад қилган.

Маттейс де Лигт (Ювентус)

Футбол агенти Мино Райола ўз мижози Маттейс де Лигтнинг ёзда "Ювентус"ни тарк этиши мумкинлигига ишора қилди, аммо у январь ойида ҳам клубларнинг диққат марказида бўлади. Хабарларга кўра, "Челси" ҳимоячига қизиқиш билдирмоқда, Райола эса нидерландиялик футболчи "Барселона", "Реал" ёки ПСЖ каби клублардан бирининг сафига ўтиши мумкинлиги ҳақида гапирди. Бироқ қишки мавсумда унинг трансфери амалга ошиш-ошмаслиги номаълум.

Сержиньо Дест (Барселона)

"Барселона" молиявий қийинчиликларни бошдан кечирмоқда, бу эса бир қатор ўйинчиларни сотишни талаб қилади ва Сержиньо Дест клуб хайрлашишга тайёр бўлган футболчилар қаторига киради. Хабар қилинишича, аввалроқ "Аякс"да ўйнаган ҳимоячига "Челси" қизиқиш билдирмоқда.

Эдинсон Кавани (Манчестер Юнайтед)

"Адашган ўғил" — Криштиану Роналдунинг "Олд Траффорд"га қайтишидан олдин Эдинсон Кавани "Манчестер Юнайтед"нинг 7-рақамли либосида ўзини яхши ҳис қилаётганди.

Трансфер амалга ошгандан бери уругвайлик футболчининг асосий жамоада ўйнаш имкониятлари чекланди ва бу клубни тарк этишга даъват бўлмоқда. "Барселона" ҳужумчига қизиқиш билдираётгани айтилмоқда.

Александр Ляказетт (Арсенал)

Александр Ляказетт 2017 йилда "канонирлар" сафига қўшилгач, унга улкан ишонч билдирилганди, аммо унинг Шимолий Лондон клубидаги фаолияти мазмунли чиқмади.

Ундаги сермаҳсул кўнгилдагидек эмас ҳамда ҳозирда жамоа сардори бўлишига қарамай, ҳужумчи Лондонни тарк этишни ўйламоқда.

Душан Влаҳович (Фиорентина)

"Фиорентина" ҳужумчиси Душан Влаҳович А Серияда гол уриш маҳоратини кўз-кўз қилмоқда ҳамда "Олтин бутса" учун Роберт Левандовски билан кураш олиб блрмоқда.

Влаҳовичнинг шартномаси 2023 йилда якунланади, шу боис "Фиорентина" яхшигина даромадга эга бўлиши учун ҳужумчини январда ёки ёзда сотиб юбориши мумкин.

Жесси Лингард (Манчестер Юнайтед)

Ўтган мавсумда "МЮ"дан ижара асосида "Вест Хэм"га ўтган Жесси Лингард фаолиятини қайта тиклагандек туюлганди, бироқ у "Олд Траффорд"га қайтгач, яна аввалги ҳолига қайтди. Ральф Рангникнинг унга бўлган ишончи ҳозирча номаълум. Клубнинг собиқ мураббийи Оле-Гуннар Сульшер Лингард жамоанинг бир қисми бўлиб қолишини айтганди, аммо ҳозир ҳаммаси телба-тескари бўлиб турибди.

Антонио Рюдигер (Челси)

Томас Тухель шартномаси келаси ёзда якунланадиган Антонио Рюдигер билан янги битим тузилиш ёки тузилмаслиги тўғрисида батафсил маълумот беришдан бош тортди, эҳтимол, марказий ҳимоячи "Стемфорд Бриж"да қолиши мумкин.

Тажрибали ҳимоячига "Реал", "МЮ" ва "Тоттенхэм" клублари қизиқиш билдирмоқда.

Франк Кессиэ (Милан)

Франк Кессиэга "Тоттенхэм" бош мураббийи Антонио Конте шахсан эътибор қаратган ҳамда ярим ҳимоячи "Милан" билан янги шартнома бўйича келишувга эриша олмаётгани сабабли А Серияни тарк этиши мумкин.

Кессиэнинг амалдаги шартномаси ёзда тугайди, бироқ у январдаги трансфер ойнасида Миланни тарк этадими ёки йўқми, буниси номаълум.

Донни ван де Бек (Манчестер Юнайтед)

Бир пайтлар "Аякс" жамоасида ёрқин юлдузга айланган Донни ван де Бек ўз даражасини юқори пиллапояга олиб чиқиш умидида "Манчестер Юнайтед"га ташриф буюрганди.

Бироқ Нидерландия терма жамоаси футболчиси жамоада асосий таркибдан ўрин эгаллашга қийналмоқда ва бу "Олд Траффорд"ни тарк этишга ундамоқда. Апрель ойида 25 ёшга тўладиган ярим ҳимоячига "Бавария" ва "Ньюкасл Юнайтед" қизиқиш билдирмоқда.

Антуан Гризманн (Атлетико)

Антуан Гризманн ушбу мавсумда "Барселона"дан ижара асосида "Атлетико Мадрид"га қайтди.

"Матрасчилар"да ижара муддатини узайтириш ёки жаҳон чемпионини сотиб олиш имконияти мавжуд бўлса-да, баъзи манбалар унинг АПЛга йўл олиши мумкинлигини таъкидлашмоқда, хусусан, "Тоттенхэм" Антуанга қизиқиш билдирмоқда.

Усмон Дембеле (Барселона)

Франция терма жамоаси футболчиси Усмон Дембеле Дортмунднинг "Боруссия"сидан "Барселона"га ўтганида, Каталонияда Неймарнинг ўринбосари сифатида катта умидлар билдирилганди, бироқ форварднинг бу умидларин оқлашига бир қатор жароҳатлар тўсқинлик қилди ҳамда унга сарфланган катта маблағ ўзини оқламади.

Унинг шартномаси ёзда якунланади. Шу билан бирга, ҳужумчи трансфери атрофида гранд клублар, жумладан, "Париж Сен-Жермен" ва "Манчестер Юнайтед" гирдикапалак бўлмоқда.

Деян Кулусевски (Ювентус)

Эндигина 21 ёшни қаршилаган Деян Кулусевски А Сериядаги энг юқори рейтингга эга ёш ўйинчилардан бири саналади.

Унинг "Ювентус"даги ўйинлари Англиянинг "Тоттенхэм" ва "Арсенал" клубларининг эътиборига сазовор бўлди, туринликлар эса швециялик футболчини январь ойида қўйиб юбориш учун 35 миллион евро талаб қилмоқда.

Хуан Мата (Манчестер Юнайтед)

Фахрий плеймейкер Хуан Мата "Манчестер Юнайтед"даги саргузаштини 2022 йилда якунламоқчи, унга яхши таклиф тушса, испаниялик ярим ҳимоячи жамоани тарк этади.

Футболчи Ла Лигага қайтиш эҳтимолидан йироқ эмас, унга "Реал Сосьедад" қизиқиш билдирмоқда, "Барселона" эса ўйинчининг тажрибасидан фойдаланиши мумкин.

Жордан Верету (Рома)

Франциялик футболчи Жордан Верету Англияга қайтиши мумкин. Хабарларга кўра, "Ньюкасл Юнайтед" ярим ҳимоячини январь ойида "Рома"дан сотиб олмоқчи. Верету 2017/18 йилги мавсумда А Серияга кўчиб ўтганидан бери "Фиорентина" ва "Рома" шарафини ҳимоя қилди.

Сердар Азмун (Зенит)

Азмунга "Лион" "совчи" юборган. Французлар ёзги трансферлар ойнасини кутишни истамаяпти ва ҳужумчи учун 4 миллион евро таклиф қилмоқда. Бироқ петербургликлар ҳам ўринбосар топмасдан туриб, жамоа етакчисини қўйиб юборишни истамаяпти.

Рафинья (Лидс Юнайтед)

"Лидс Юнайтед" АПЛда кўпроқ жон сақлаб қолиш учун кураш олиб бораётган бўлса-да, Рафинья ўзини кўрсатишда давом этмоқда. Бразилиялик ярим ҳимоячи 2021/22 йилги мавсумда голлари билан кўпчиликнинг эътирофига сазовор бўлди. У жорий мавсум АПЛда 8 та гол уришга эришди. "Ливерпуль" Рафиньяни январь ойидаёқ сотиб олмоқчи, "Бавария" скаутлари ҳам футболчининг ўйинларини мунтазам равишда кузатиб бормоқда.

Оқил Абдубарноев тайёрлади