Хосе Мария Мендес Таиланд билан Жаҳон чемпионатида қандай натижа қайд этмоқчи? Ўзбекистондан нима кутяпти? Испаниялик мураббий билан интервью

Осиё плей офф ўйинларида Ироқ - Таиланд ва Вьетнам - Ливан жамоалари ўзаро кураш олиб боришди. Уй-меҳмон тарзида бўлиб ўтган баҳслар натижасига кўра, Таиланд билан Вьетнам ўз мақсадларига етиб, ЖЧ йўлланмасига эга бўлишди. Айни пайтда Ўзбекистондаги мухлисларга яхши таниш бўлиб улгурган, ўз вақтида Ўзбекистон футзал терма жамоасини илк бор мундиалга олиб чиққан испаниялик мураббий Хосе Мария Мендес Таиланд терма жамоасини бошқармоқда. Яқинда ушбу мураббий билан алоқага чиқиб фикрларини тингладик.

- Салом жаноб Хосе Мария Мендес. Аввало Таиланд терма жамоасини Жаҳон чемпионатига йўлланма олгани билан табриклаймиз. Ироқ билан ўйинларда ғалабалар осонликча қўлга киритилгандек таассурот қолдирди...

- Катта раҳмат. Ўзбекистонга алангалик салом. Пандемия нафақат бизга, балки барча терма жамоаларнинг тайёргарлигига ўз таъсирини ўтказди. Биз учун жуда қийин вазият юзага келиб қолди. Чунки февраль ойида Таиланд терма жамоаси Осиё чемпионатига жуда яхши ҳозирлик кўрганди. Мусобақа биринчи маротаба қолдирилгач яна мураккаб ҳолатга тушиб қолдик. Ҳаттоки машғулотлар ўтказиш учун ҳам вақтимиз қолмаганди. Таркибимизда жароҳат олган ўйинчилар бор эди. Мавжуд вазиятдан келиб чиқиб режаларимизни ўзгартиришга мажбур бўлдик, дея оламан. Жаҳон чемпионатига чиқиш йўлида Ироқни иккита ўйинда мағлуб этдик. Бу ўйинларда ғалабадан бошқа нарса муваффақиятсизлик ҳисобланарди. 

- Ҳа, пандемия сабабли мусобақанинг қолдирилиши кўп терма жамоаларга зарар келтирди. Масалан Қувайт терма жамоаси олдинга катта қадам ташлаётганди. Бош мураббийликка машҳур Какаони олиб келди...

- Ҳа, пандемия кўпчиликка фойда келтирмади. 

- 2016 йил Колумбиядаги Жаҳон чемпионатида Таиланд гуруҳдан чиққан, нимчорак финалда Озарбайжонга имкониятни бой берганди. Бу сафарги мақсадлар қандай?

- Мақсадимиз камида ўтган сафарги натижани такрорлаш. Бир очко ҳам бунда муҳим аҳамият касб этади. 2016 йил Таиланд ёмон қатнашмаганди. Жаҳон чемпионатига оддий жамоалар бормайди. 

- Литвадаги Жаҳон чемпионати Ўзбекистон учун иккинчиси ҳисобланади. Қайсидир маънода терма жамоамизда бу борада кўникма мавжуд, дейишимиз мумкин. Лекин таркибда бундай катта нуфузли мусобақада илк маротаба ўйнайдиган ёшлар ҳам бор...

- Албатта. Жаҳон чемпионатидаги иккинчи иштирок Ўзбекистон футзал терма жамоасига қўшимча ишонч ва мотивация бериши мумкин. Айрим футзалчилар бундай тажрибага эгалар. Биринчи маротаба қатнашадиган ёш футзалчилар катта тажриба тўплашлари учун Жаҳон чемпионати яхши имконият. Қандай натижа кутяпман? Кўп нарса қуръага боғлиқ. 

Абдулазиз Искандаров суҳбатлашди