Туркиядаги зилзила оқибатида "Сивасспор" мураббийининг 15 нафар қариндоши ҳалок бўлди

Бу ҳақда "Hurriyet "нашри хабар бермоқда.

"Сивасспор"нинг расмий сайтида ҳам Тенбелўғлига ҳамдардлик мактуби пайдо бўлди, бироқ вафот этган қариндошлари сони кўрсатилмаган.

"Кахраманмарашда рўй берган зилзила оқибатида жамоамиз ёрдамчи мураббийларидан бири, Хатайда яшовчи Айхан Тенбелўғлининг кўплаб яқинлари ҳалок бўлгани ҳақида қайғули хабар олдик. Айхан Тенбелоғли, унинг оила аъзолари ва яқинларига ҳамдардлик билдирамиз ҳамда ҳалок бўлганларни Аллоҳдан раҳматига олган бўлсин деймиз", – дейилади клуб баёнотида.

Душанба куни эрталаб Туркия жануби-шарқида 7,7 магнитудали зилзила юз берди. Сўнгги маълумотларга кўра, 4 мингга яқин одам қурбон бўлган.

Ўзбекистон Ташқи ишлар вазирлигига кўра, бугун Туркиядаги зилзила оқибатида Малатья провинциясида бир нафар Ўзбекистон фуқароси ҳалок бўлди. Бундан ташқари, тўрт нафар ҳамюртимиз бедарак йўқолган. Уларни топиш бўйича тезкор қидирув-қутқарув ишлари амалга оширилмоқда.