Тимур Кападзе: "Ҳамма жамоани ҳурмат қиламиз, лекин ҳеч бир рақибдан қўрқмаймиз"

Биринчи турда «Олимпик» «Сурхон»га қарши майдонга тушади. Қуръа ташлаш маросими ва турнир ҳақида жамоа бош мураббийи Тимур Кападзе ўз фикрларини билдирди. 

"Менимча, қуръа анча яхши ўтди. Биринчи баҳсда кимга қарши майдонга тушишимизни кутаётган эдик. Умуман олганда, биринчи турларда ҳамма жамоаларнинг имкониятлари тенг бўлади деб ўйлайман. 

Ҳар бир учрашув қизиқ ва қийин бўлиши аниқ. «Олимпик» жамоаси Суперлигада дебют қилади ва бу бизга катта тажриба бўлади деб ўйлайман. Бу учрашувлар орқали олдимизга қўйган вазифамизни уддалаймиз. Биринчи турда «Сурхон» билан тушдик. Умуман олганда, кимга қарши майдонга тушишимизни аҳамияти йўқ. Чунки ҳамма билан қайсидир турда тўқнаш келишимиз аниқ. Мусобақани уйда бошлашимиз эса яхши деб ўйлайман. 

Биз аутсайдер бўлиб қолмаймиз деб ўйлайман. Чунки тайёргарлигимиз анча яхши ўтмоқда. Биз ўз ўйинимизни кўрсатамиз. Болалар ҳам бунга тайёр. Ҳамма жамоани ҳурмат қиламиз, лекин ҳеч бир рақибдан қўрқмаймиз. Барчаси майдонда ҳал бўлади. Биз барчасига тайёрмиз", - деди Тимур Кападзе.