Суперлиганинг энг кучли легионери ким? (Сўровнома натижалари)
23 мая 2021 14:37
Новости

Суперлиганинг энг кучли легионери ким? (Сўровнома натижалари)

Телеграм каналимизга Ўзбекистон чемпионатида ўйнаётган легионерлар билан боғлиқ сўровнома қўйгандик.

Ўтган вақт мобайнида 16 мингдан зиёд ўқувчи сўровномада иштирок этиб, ўзларига маъқул вариантни танлашди.

"Ҳозирги кунда Суперлиганинг энг кучли легионери ким?" деб номланган сўровномада қатнашганларнинг 62 фоизи "Насаф" ярим ҳимоячиси Марко Станоевичга овоз беришди. Натижада Марко сўровномада биринчи бўлди.

Бу борада иккинчи ўрин "Пахтакор" етакчиси Драган Черанга насиб этди. Сербиялик футболчи 26 фоиз овоз тўплади. Дарвоқе Черан ҳозирча Суперлигада 6та гол уришга муваффақ бўлди. Станоевич ҳисобида эса 4та гол бор.

"Бошқа футболчи" варианти 6 фоиз тўплаган бўлса, АГМКдаги Элвин Фортес 4 фоиз овоз билан футболчилар орасида учинчи бўлди. Шунингдек "Қизилқум" вакили Элгужа Григалашвили билан "Машъал" легионери Самуэль Онониву атиги 1 фоиздан тўплашди.

Кўриниб турибдики, ушбу сўровномада Марко Станоевич катта фарқ билан ўз ҳамкасбларини ортда қолдирган. "Насаф" легионер танлашда жуда эҳтиёт бўлиб иш кўрадиган клублар сирасига киради. Жамоа бош мураббийи Рўзиқул Бердиев бу борада доим етти ўлчаб бир кесади. Шу боис ҳам "Насаф" ёппасига хорижликларни таклиф этмайди, балки чертиб-чертиб олади.