Шуҳрат Мақсудов: "Тинч юрибмиз, тинч юрақолайлик..."

"Жиззахда бизни яхши кутиб олишгани учун миннатдорчилик билдираман. "Бунёдкор" учун ҳар бир ўйин курашларга бой бўлмоқда. "Сўғдиёна" айни пайтда мусобақа жадвалида иккинчи ўринда бормоқда ва осон бўлмаслигини билгандик. Шунга яраша яхши тайёргарлик кўргандик.

Улуғбек Бақоевни анчадан бери биламан, у терма жамоада ишлаганимда қўл остимда ўйнаган. У ҳам мен каби ютқазишни хоҳламайдиган мураббий. Улуғбек хафа бўлмасин, бугун биз ғалабага кўпроқ лойиқ эдик. Дуранг ҳам ёмон эмас. Барча футболчиларга, ҳатто захирада қолганларга ҳам раҳмат айтаман", - дейди Шуҳрат Мақсудов.

- "Сўғдиёна" жамоасидаги сўнгги йиллардаги ўзгаришлар ҳақида нималар дея оласиз?
- Жиззахда доим жамоа яхши бўлган. Айни пайтдаги натижаларга Бақоевнинг ҳиссаси жуда катта. У футболчилик пайтида ҳам ютқазишни ёқтирмасди, мураббий сифатида ҳам шогирдларига шуни сингдирмоқда.

- Бугун "Бунёдкор" икки очко йўқотдими ёки бир очко олдими?
- Юқорида айтганимдек бугун биз ютуққа ҳақлироқ эдик. Гол ҳам ургандик, уни бекор қилишди. Балки ростдан ҳам ҳужумчи дарвозабонга урилгандир, билмадим.

Шу ўринда "Ўзбекнефтгаз" АЖ бошқарув раиси Абдуллаев Меҳриддин Раззоқовичга алоҳида раҳмат айтаман. Ҳомийлик клубга яна қайтариб берилди ва куни кеча олдинги ғалабалар учун мукофот пуллари берилди. Бу эса футболчиларга қўшимча мотивация эканлиги шубҳасиз.

- Ўйинга озгина қолганида VAR тизими ишламаслиги ҳақида хабар чиқди...
- Тўғриси VAR ва ҳакамлар ҳақида гапиришни истамайман. Тинч юрибмиз, тинч юрақолайлик.