Шота Арвеладзе: "Четлатиш ишимизни енгиллаштирди, лекин..."

Бош мураббий Шота Арвеладзега Тиаго Безерра ҳамроҳлик қилди. 

Ш.Арвеладзе: Аввало, бугунги ғалаба билан клуб раҳбарияти, футболчилар ва мухлисларимизни табриклайман. Жуда муҳим ўйинда чиройли ғалабага эришдик. Кубок мусобақаси совринни қўлга киритиш борасидаги энг қисқа йўл ҳисобланади. Бугун биз ярим финалга йўл олдик. Бу эса жамоамизни соврин сари яна бир қадамга яқинлаштирди. Ўйин ҳақида фақат ижобий фикр билдира оламан. Рақиб жамоа майдонда бир киши кам бўлиб қолсада, охиригача мардоновор курашди. Тан олиш керак, сон жиҳатидан устунлик ишимизни енгиллаштирди. Муҳими, биз керакли пайтда голларни киритиб олдик. 

Т.Безерра: Узоқ танаффусдан сўнг яна ўз майдонимизда ўйнаганимиздан хурсандмиз. Кучли рақиб устидан йирик ҳисобда ғалаба қозониш эса бу икки хисса қувонарли ҳолатни юзага келтиради. "Локомотив" ҳурматга сазовор жамоа. Бугун меҳмонлар ажойиб ўйин намойиш этишди. Хатто майдонда бир киши кам бўлиб қолганларида ҳам ҳужум қилишдан чарчашгани йўқ. Биз эса ўйиндан-ўйинга кучайиб боряпмиз. Кейинги учрашувлада ҳам мухлисларни чиройли ғалабаларимиз билан хушнуд этишга ҳаракат қиламиз.  

Ш.Арвеладзе: Бу муҳим ўйинга тайёргарлик кўришда иккала мураббийга ҳам осон бўлгани йўқ. Ўн уч нафар футболчимиз терма жамоа ихтиёрида бўлди. Улар 12 сентябрь куни ихтиёримизга етиб келишди. "Навбаҳор" жамоасига қарши кечган учрашувдан бир кун олдингина сафимизга қўшилишди. "Локомотив"да ҳам худди шундай ҳолат эди. Айтмоқчи бўлганим, таркибнинг тўлиқ бўлмаганлиги сабаб биз мураббийлар машғулотларни тўлақонли тарзда олиб боролмаймиз. Масалан, захирамизда қолиб кетаётган Яхшибоевни олинг. У йигирма кун давомида олимпия терма жамоаси ихтиёрида бўлди. Лекин жароҳати сабаб ўйинларда иштирок этмади. Ўйин амалиётисиз қолиб кетди. Мен Жамшид Искандеров ва бошқа футболчиларимизнинг ҳам асосий таркибда ўйнашларини истайман. Лекин майдонда фақат 11 футболчининг хизматидан фойдалана оламан. Рақобатнинг бўлгани яхши.   

- Черан ҳақида қандай фикрдасиз?

Ш.Арвеладзе: Сўнгги ўйинларда гол ура олмаётган бўлсада, ўз хатти-ҳаракатлари билан жамоамизнинг муваффақиятига хисса қўшиб келяпти. Чераннинг нимага қодир эканлигини яхши биламан. У ўзининг муҳим голлари билан ҳали "Пахтакор" ғалабаларига муҳим хисса қўшади. Бугун "Локомотив" жамоаси ҳам яхши ўйин намойиш этди. Фақат ўша қизил карточка кўрсатилган вазият кўп нарсани ўзгартириб юборди. Ўйиннинг кульминацион нуқтаси айнан четлатиш ҳолати бўлди дейиш мумкин. Тўғри, биз ғалабани сақлаб қолишимиз мумкин эди. Лекин бу даражада йирик ҳисоб қайд этилмасди.