Шоҳжаҳон Ҳасанов: “Роналду билан учрашувдан кейин фаолиятимда пасайиш бўлган”

“Реал Мадрид” аъзоси Тошкентдаги “Жар” стадионида ёш футболчиларга мастер-класс кўрсатганди. Ўшанда Роналду билан бирга тўпни маҳорат билан ўйнатган жажжи болакайни барча яхши эсласа керак. Ўшанда 12 ёшда бўлган Шоҳжаҳон Ҳасанов бир зумда дунёга машҳур бўлиб кетганди. Кўпчилик уни ўзбек футболи келажаги деб атаганди ҳам. Орадан 8 йил вақт ўтди. Кичкинагина бола бугунга келиб 20 ёшга қадам қўйди. Бироқ негадир у олий лиганинг ҳеч қайси клубида, хатто ёшлар таркибида ҳам кўриниш бергани йўқ. Биз Шоҳжаҳонни топиб у билан суҳбатлашишга қарор қилдик.

- Дастлаб футболга қандай қилиб келишингиз тарихи ҳақида сўзлаб беринг.
- Андижон вилояти Шаҳрихон туманида туғилганман. 8 ёшимдан тўп тепишни мустақил равишда бошлаганман. 9 ёшимга қадар кўчада футбол ўйнаб юрардим. Турли финтларни бажариб телефонда роликлар тарқалиб кетган. Кейин "Бунёдкор"дагилар мени академияга таклиф қилишганди.

- “Бунёдкор”га келганингизда қайси мураббий билан ишлагансиз?
- Академияга келиб Сергей Лушан қўл остида шуғуллана бошлаганман. У муомаласи яхши, ҳамма билан тез чиқишиб кетадиган мураббий эди. Клубга келганимда мени яхши кутиб олганди.

- Ўшанда сиз билан бирга ўйнаганлардан кимлар футболдаги фаолиятларини давом эттиришмоқда?
- Исломжон Қобилов билан бирга ўйнаганман. Ҳозир у “Бунёдкор” асосий таркибида ўйнаб келмоқда.

- Криштиану Роналду Тошкентга келганида у билан бирга тўп тепишга муваффақ бўлгансиз. Ўша воқеа қандай содир бўлгани ёдингизами?
- Болалар қаторида Роналдунинг олдига чиқаётганимизда Сергей Лушан менга бутсани кийиб олишимни айтганди. Стадионга чиқиб келгач қўшиқчи Райҳон билан бирга чиқишимни ва тўп ўйнатишимни айтишди. Бироқ Лушан “Йўқ, бу фақат Роналду билан бирга тўп ўйнатади” деб қатъий туриб олганди. Шундай қилиб Роналду билан бирга финт қилгандик.

- Сизга бир кун олдин кимдир шундай бўлиши ҳақида айтганмиди? Яъни огоҳлантириб қўйишганмиди?
- Бир кун олдин ҳеч ким айтмаган, барчаси ўша пайтнинг ўзида содир бўлган. Лекин негадир Роналду Тошкентга келади дейишганида у билан тўп тепишимни ич-ичимдан ҳис қилганман.

- Ёнингизда миллионлаб мухлисларга эга бўлган жаҳонга машҳур супер юлдуз турарди. Ёш бўлгансиз, шуларни ҳис этганмисиз?
- Қаршимда жаҳон юлдузи эканини ҳис қилганман албатта. Стадионда мухлислар йўқ деб тасаввур қилганман, фақат Роналду иккимиз тўп тепаётгандек хаёл қилганман. Акс ҳолда финтлар бунчалик чиройли чиқмасди деб ўйлайман.

- Роналду сиз билан гаплашганми?
- Менга нимадирларни гапирган, лекин у нима деганини тўғриси тушунмаганман. Фақат жарима тўпи тепамиз деганини тушунганман холос. Мастер классдан сўнг жарима тўпларини амалга оширгандик.

- Ўшандан кейин Шоҳжаҳон Ҳасановнинг ҳаёти ва фаолиятида қандай ўзгаришлар содир бўлди?
- Ўша воқеадан албатта жуда катта машҳурликка эга бўлдим. Абдураҳмон Фозилов менга ёрдам бериб юрардилар. Бутсалар ва бошқа нарсалар олиб берарди, қўлидан келганича ёрдам берарди. Аммо кўпинча машғулотлар вақтида мени кўрсатувларга ёки бошқа тадбирларга олиб кетишарди. Машғулот ўртасида келиб мени олиб чиқиб кетишарди. Сергей Лушан ва раҳбариятнинг кўзига ёмон кўриниб қолдим... Қолган футболчилар машғулот ўтказаётганда мен шоу-бизнес вакилига айланиб қолгандим. Шу тариқа фаолиятимда пасайиш кузатилди ва “Бунёдкор”дан ҳам кетдим...

- “Бунёдкор”дан кетгач нима бўлди? “Оқ-тепа” сафида ўйнаганингизни биламиз...
- Кейин фаолиятимда анча катта танаффус бўлди. "Андижон"да биринчи лигада ўйнадим. Сўнгра "Оқ-тепа"га бордим, бу клубда Ғанишер Шоғуломов менга ёрдам берди. Бу инсонга ҳам раҳмат айтаман. Ҳозир эса "Локомотив" клуби ёшлари сафида ўйнаяпман. Ушбу жамоага келишимда Тўлабек Акрамовнинг хиссаси катта бўлди. Унинг ишончини оқлайман деб умид қиламан. Иккинчи даврадан айнан "Локо" шарафини ҳимоя қилаяпман.

- Кўплаб одамлар финт қила оладиган футболчилар футболни у қадар яхши ўйнай олмайди деб ҳисоблайди. Сизда ҳам шундай вазият бўлмаганми? Яъни фақат тўп билан чиройли ҳаракатлар қилишда тенги йўқсиз, лекин футбол майдонида у қадар ёрқин ўйнай олмассиз?
- Йўқ мени футбол ўйнашимни кўпчилик кўрмаган шунинг учун шундай фикр келиб чиқади. Тўғри финтга эътибор қаратганман, лекин футболни яхши ўйнай олишимни биладиган одамлар ҳам бор. Агар ўша ёшлигимда машғулотларни ярмидан ташлаб кетмаганимда балки Лушан мени кучли футболчи қилган бўлармиди. Балки "Бунёдкор" асосий таркибида ўйнаётган бўлармидим. Ачинарлиси ҳозир ўша кичкиналигимда машғулотлардан кўрсатувларга олиб чиқиб кетган одамлар ёрдам беришмаяпти...

- Демак ёшларга машҳур бўлиш ҳам салбий таъсир қилар эканда...
- Ёш футболчиларга бирдан машҳурлик ҳам керак эмас. Барчаси секин аста, босқичма босқич бўлгани яхши экан.

- Ўша машҳур финтларингизни қайсидир футбол мактабида ўрганганмисиз? Ёки кўчадами?
- Кўчада ўрганганман. Роналдиньонинг видеоларини кўриб унга ўхшашга ҳаракат қилганман. Кичкиналигимда дарсларни кўп қолдирганим учун мактабда икки йил синфда қолиб кетдим. Укам билан бирга мактабни битиргандим. Кўча футболидан чиққанман буни тан оламан.

- Яқинда Ўзбекистон терма жамоаси Жаҳон чемпионати йўлида иккита муҳим ўйин ўтказади. Сизнингча мундиалга чиқишга имкониятимиз борми?
- Имкониятимиз бор. Барчаси футболчиларнинг ўзининг қўлида. Футболчилар ҳаракат қилмаса бари бекор. Мухлислар уларни қўллаб туришса албатта Жаҳон чемпионатига чиқамиз.

- Олдинги воқеалар бўлиб ўтди, уни ортга қайтариб бўлмайди. Энди “Локомотив” сафида ўзингизни кўрсатиб кучли футболчи эканлигингизни барчага кўрсатиб қўйишни истайсизми?
- Худо хоҳласа шунга умид қилаяпман. Мақсадим ҳам шу. Маҳаллада тўп тепиб юрганимда Жасур ака деган одам менга ёрдам берди. Шу инсонга алоҳида раҳмат айтаман.

- Интервью сўнггида айтар сўзингиз...
- Мени қўллаб-қувватлаган барча мухлисларга раҳмат айтаман. Сиз журналистларга ҳам мени унутиб қўймаганингиз учун миннатдорчилик билдираман.

Нарзулла Сайдуллаев

ВИДЕО. Криштиану Роналду билан финт қилган ўзбек боласи ҳозир қаерда?