Рўзиқул Бердиев: "Афсуски кетган ўйинчиларнинг ўрнини тўлдира олмадик"

"Ҳозиргача 3та ўйин ўтказдик, қанчалик имкониятга эга эканлигимиз кўриниб турибди. Кучимиз борида рақибга муносиб қаршилик кўрсатаяпмиз, кучимиз тугаганда рақиблар устунликка эришишмоқда. Ўтган ўйинда ҳам, бугун ҳам шундай бўлди. Буни жуда яхши кўриб турибмиз. 3-турдаги "Навбаҳор" билан ўйиндан кейин чемпионатда танаффус бўлади ва жисмоний ҳолат устида ишлашимиз керак", - деб гап бошлади Рўзиқул Бердиев. 

- Марко Станоевич алмаштирилиши ўйин суръатига таъсир қилдими?
- У мавсумолди йиғинлар пайтида кўп машғулотларни ўтказиб юборди. Учта ўйин ўтказган бўлсак унда 70-дақиқадан кейин чарчоқ кучаймоқда ва кўп хато қилмоқда. Марко етакчимиз ҳисобланади, лекин жисмоний ҳолати юқори даражада бўлиши керак.

- "Пахтакор" билан ўйиндаги тажовузкорликни кўрмадик. Бунга нима сабаб бўлди?
- Бу жисмоний толиқиш билан боғлиқ. Эътибор берган бўлсанглар биринчи таймда АГМКга нисбатан яхши ўйнадик. Лекин "Пахтакор" билан ўйиндан кейин йигитлар билан гаплашгандик ва иштиёқни йўқотмасликка келишиб олгандик. Афсуски бугун иккинчи таймда бир томондан кучимиз етмай қолди, иккинчи томондан ҳисобни ушлаб қолишга уриндик. Захирамиз торлиги ўйинларга таъсир қилишини билардик. Лекин имкониятимиздан келиб чиқиб вазиятдан чиқиб кетишга уринамиз.

- Шоҳмалик Комилов иккита турда ҳам тўлиқ ўйнамади...
- У кўп техник хатоларга йўл қўймоқда. Марказий ярим ҳимоячи ҳужумга ҳам, ҳимояга ҳам бирдек ёрдам бериши керак. Тўғри "Пахтакор"га гол урди, лекин унинг ўйинидан тўлиқ қониқмаяпмиз. Марказдаги футболчилар тўпни яхши назорат қилиши керак, агар бу вазифаларни бажара олмаяптимиз демак уни алмаштириш керак.

- Ғолиб Ғайбуллаев майдонда кўринмаяпти.
- Айни пайтда марказий ҳимоячилар Умар Эшмуродов ва Ҳусниддин Алиқулов яхши ўйнашмоқда. Шу боис ҳозирча Ғайбуллаев захирада. Албатта Ғолиб ҳам асосий футболчимиз, албатта ҳали имконият берамиз.

- Дилшод Саитов қачон сафга қайтади?
- Уни тезроқ майдонга тушишини кутаяпмиз. Чунки етакчи ўйинчиларимиздан бири ҳисобланади. Секин-аста машғулотларга қўшилмоқда. ФИФА кунлари сабабли бўладиган танаффусдан кейин балки майдонга тушиши мумкин.

- Дилшод Раҳматуллаевнинг кетишига нима сабаб бўлди?
- Унинг кетиши жамоамизнинг молиявий имкониятига боғлиқ. Албатта бундай футболчилар бизга керак эди. Афсуски кетган ўйинчиларнинг ўрнини тўлдира олмадик. Бунинг бир нечта сабаби бор жуда яхши биласизлар, яна такрорлашни истамайман. Шу боис айни пайтда бор имкониятдан фойдаланамиз.