Пети: “Неймар фақат ўзи учун ўйнайди”

“Мен терма жамоада Зидан ва Жоркаефф билан тўп тепганимда, айнан шу икки футболчиларнинг ўйин тақдирини ҳал қилиб юбориши мумкинлигини билардик. Улар ҳимояга ҳам, ҳужумга ҳам бирдек ёрдам беришарди. Биз шунчаки ўз вазифамизни бажарардик, ваҳоланки шу икки йигит кўп ҳолларда кўп нарсани ўзгартириб юбориш қудратига эга эдилар.

Аммо бундай характер Неймарга хос эмас. Бу йигит фақат ва фақат ўзи учун ўйнаяпти. ПСЖ ечиниш хонасидаги футболчиларнинг ўрнига ўзингизни қўйиб кўринг, улар бир неча ойлардан буён унинг бундай қилиқларига чидаб келишмоқда. Неймар клуб ва унинг мухлисларини назар писанд қилмаяпти. Уларга ҳурматсизлик қилаяпти”, деди Пети “RMC Sport”га берган интервьюсида.

Эслатиб ўтамиз, Неймар 2017 йилдан буён ПСЖда тўп тепиб келмоқда. Унинг жамоаси билан шартномаси 2022 йилнинг ёзига қадар мўлжалланган.