"ЎФФ Президенти кубоги" мусобақасида 3-тур учрашувлари ўтказилди

Ҳаваскор жамоалар ўртасида ўтказилаётган мусобақа шиддати шу қадар юқорики, баҳсларни спорт мажмуасида томоша қилаётган, шунингдек ЎФФнинг YouTube канали орқали кузатиб бораётган мухлислар сонининг турдан турга ортиб бораётгани бунга яққол мисолдир.

3-турнинг барча учрашувлари томошабоп ўтди, десак янглишмаймиз. Айниқса, "Баҳрайн–2025" мусобақасида қатнашган ўсмирлар терма жамоаси аъзоларидан шаклланган Ўзбекистон ёшлар терма жамоасининг Республика Божхона қўмитаси футзалчиларига қарши ўйини юқори суръатларда кечди. Тўққизта гол урилган ушбу баҳсда ёшлар терма жамоаси 6:3 ҳисобида зафар қучиб, мусобақадаги биринчи г/алабасини расмийлаштирди.

Мусобақа мезбонлари — ТАТУ футзалчилари "Олимпик" жамоасига имконият қолдирмади. "Истиқлол"нинг SQB жамоасини мағлуб этгани эса турнинг энг кутилмаган натижаси сифатида қайд этилди. Дастлабки икки турда ҳам ғалаба қозонган "Парма" ва "Камол Конструкцион" жамоалари баҳси турнинг марказий учрашувига айланди. Тезкор ва кескин ҳужумлар остида кечган ўйин тақдирини сўнгги сонияларда жаримадан урилган гол ҳал этди. Муҳим уч очкони қўлга киритган "Парма" мусобақанинг якка пешқадамига айланди.

IMV ва BMB жамоалари ўртасидаги учрашув эса Иқтисодиёт ва молия вазирлиги жамоасининг Регламентнинг 6.4-банди талабларига амал қилмагани сабабли ўтказилмади. Натижада IMV'га техник мағлубият, BMB'га эса техник ғалаба берилди.