"Ньюкасл" асосий футболчиси билан шартномани узайтиришга яқин

Эдди Хау жамоаси Чемпионлар Лигасида ажойиб ўйин ўтказди. "Ньюкасл" ПСЖни 4:1 ҳисобида мағлуб этишга муваффақ бўлди, бу эса ҳозирда мусобақада ўз гуруҳида биринчи ўринни эгаллаб турганини англатади.

Бу муваффақиятда асосий ўйинчилардан бири Бруно Гимараэснинг ҳиссаси катта. Марказий ярим ҳимоячи узоқ вақтдан бери "Ньюкасл"нинг асосий таянч футболчиси бўлиб келган.

Бразилиялик футболчининг клуб билан амалдаги шартномаси 2026 йилнинг 30 июнига қадар тузилган. Бироқ инсайдер Фабрицио Романонинг айтишича, футболчи тез орада шартномасини 2027/28 йилги мавсум охиригача узайтиради.

Ҳар икки томон бу масалада тўлиқ келишувга эришган, фақат расмий эълон қилиш қолган.

Гимараэс жорий мавсум "ҳаккалар" сафида 10 та баҳсда қатнашди. Унинг ҳисобида 1 та гол ва 2 та голли пас бор.