Месси Бускетсга: "Сен ҳар доим 5-рақамда ўйнагансан, аммо футболчи ва инсон сифатида ҳар доим 10 эдинг"

Хабар берилганидек, Серхио Бускетс ушбу мавсум якунида "Барселона"ни тарк этади. Футболчининг ўзи ҳам бу нарсани эълон қилди. Жамоанинг бошқа бир афсонаси Лионель Месси эса ўз қадрдон дўстининг ушбу қарорига муносабат билдирди.

"Майдонда сен ҳар доим 5-рақамда ўйнагансан, аммо футболчи ва инсон сифатида ҳар доим [10 дан] 10 эдинг, Буси. 

Янги босқичда сенга энг яхшисини тилайман. Умуман, ҳар доим сен ва оилангга энг яхшисини тилаб қоламан.

Сенга барчаси – майдондаги ва майдон ташқарисидаги онлар учун раҳмат. Биз сен билан биргаликда жуда ажойиб лаҳзаларни, қийин дамларни бошдан ўтказдик. Бу хотиралар абадий қолади. Қаттиқ қучиб қоламан", -деб ёзади Лионель Месси ўзининг инстаграм саҳифасида. 

Маълумот учун, Серхио Бускетс "Барса" сафида — 3 тадан Чемпионлар Лигаси, Клублар ўртасидаги ЖЧ, 8 карра Ла Лига чемпиони, 3 карра УЕФА Суперкубоги, 7 мартадан Испания Кубоги ва Суперкубогини қўлга киритган.