Любинко Друлович: "Мисрдек кучли жамоани мағлуб эта олдик"
10 июн 2019 12:23
Новости

Любинко Друлович: "Мисрдек кучли жамоани мағлуб эта олдик"

Ўзбекистон ОТЖ - Миср ОТЖ (2:0) ўртасидаги ўртоқлик учрашувидан сўнг Любинко Друлович ўз фикрларини билдирди.

"Биз Мисрдек кучли жамоани мағлуб этдик. Тактик томонлама яхши ўйнадик, уларни ўрганиб чиққандик. Менимча майдонда ёмон кўринмадик. Ҳимоядан ҳужумга ўтишда тез ҳаракат қилганимиз ёқди. Буни машғулотларда ишлаб чиққандик. Барчани, футболчиларни, журналистларни табриклайман. Бугунги ғалаба барчамизники", - дейди Любинко Друлович.

- Бугунги ўйинда сизга нима ёқди ва нима ёқмади?
- Бизда узоқ муддат жароҳатини даволаган футболчилар бор эди. Масалан, Абдихолиқов ва Ғаниев. Улар узоқ муддат майдонга тушишмаганди. Жисмоний ҳолатни яхшилаш борасида қийналдик. Бугун барча ўйинчиларимиз яхши ўйнашди, захирадан тушганлар ҳам.

- Намангандаги ўйинда қандай ўзгаришлар кўрамиз?
- Албатта, ўзгаришлар бўлади, сабаби 48 соатда футболчиларни қайта тиклаш оғир. Таркибдаги қолган футболчиларга ҳам имкон бераман.