Клопп: “Омад келмади”

“Улар ўйин стартини жуда агрессив бошлашди ва кейин нима бўлиши аниқ эди. Баҳс бошида тажовузкор ҳаракат қилиб, дарвоза устунини пойлашди.

Ўтказиб юборилган голдан кейин эса устунликни ўз томонимизга оғдирдик ва хоҳлаганимизча ўйнадик. Баъзи вазиятларда омадимиз келмади, танаффусгача ҳисобни тенглаштирсак зўр бўларди.

Ўтказиб юборилган иккинчи гол ҳам бизга ёрдам бермади, голимиздан кейин эса ўйин қизғин кечди. Албатта, бу биз кутган натижа эмас.

Хотиржам ҳаракат қилиб, “Манчестер Юнайтед”га қарши сафардаги ўйинда ақл бовар қилмас даражада кўп зарба бердик. Бироқ, бундай вазиятлардан фойдаланиш керак. 2-таймда Де Хеа фантастик сейв кўрсатди.

Идеалимиздаги ўйинни намойиш этолмадик, 100 фоизга тайёр эмасдик. Иккинчи жамоа ролида бўлишимиз керак эди ва бу биз истаган ҳолат эмас. Рақибнинг қарши ҳужумга ўтишга қодирлигини ҳисобга олсак, бу қийинроқ кечди.

Иккинчи голни қабул қилиш қийин. Бизда бу ҳафта ихтиёримизда 14-15 ўйинчи бор эди ва энди улар жароҳат олмаганига ишонч ҳосил қилишимиз лозим.

Ғалаба қозонишимиз керак эди. Биламан, аҳмоқона эшитилмоқда, аммо менга шундай туюлди.

Ҳозирги вазиятимиздан хавотирдаман, аммо буни шундай қабул қилиш керак”, дейди Клопп.