Уэйн Руни: "МЮнинг "Сити" устидан ғалабаси Фергюсон даврини эслатиб юборди. Жамоа ДНКси мана шундай бўлиши керак"

"Мен стадионда эмас, студияда эдим, лекин фарқни сездингизми? Ҳатто Майкл Кэррик ўйин олдидан майдонга чиқиб, мухлисларни руҳлантиришга ҳаракат қилгандаёқ нимадир ўзгаргани билинди. Менимча, мухлислар сэр Алекс Фергюсон давридаги муҳитни ҳис қилишди. Очиғини айтганда, ёш мухлислар Ферги кетганидан кейинги охирги 10-13 йил ичида анча қийналиб қолишганди. Улар жамоанинг бу қадар яхши ўйнаганини ҳали кўришмаганди.

Мен ҳам шу клубнинг бир қисми бўлганман, турли таркибларда ўйнаганман. Лекин улар жамоанинг бундай энергия, ўз кучига бўлган ишонч, жасоратли ва иродали ўйин кўрсатганини анчадан бери соғинишганди. Умид қиламанки, қолган 16 та ўйинда ҳам бизни шундай футбол кутмоқда.

Майкл жамоада бирор ғайритабиий нарса қилгани йўқ. Шунчаки таркибни шакллантиришда оддий тузатишлар киритди. Кўпчилик Рубен Аморимнинг учта ҳимоячидан иборат тактикаси ҳақида гапирганди, лекин "Юнайтед" аслида оддий нарсаларни қилиши керак — майдонда югуриши ва қаттиқ меҳнат қилиши лозим. Футболчиларнинг айнан шундай қилаётганини кўриш ёқимли бўлди. Бу менга МЮнинг ҳақиқий ДНКси қандай эканини эслатиб қўйди", — деди Руни The Wayne Rooney Show подкастида.