“Футбол юлдузлари” китоби муаллифи Дилшод Исроилов вафот этди

Унинг профессионал маҳорати ҳақида албатта, жамоадошлари сўз айтсалар маъқул. Чунки у бу газетада узоқ йиллар бўлим бошлиғи, Бош муҳаррир ўринбосари бўлиб ишлаб, жамоат орасида ҳурмат ва эътибор топган эди.

Биз эса, унинг кўпгина улфатлари қаторида яна бир кичик давра қадрдонлари сифатида, унинг вафотидан ғамсиниб қолдик. Дилшод давраларда суҳбатлар тизгинини ушлаб тура олар, янги ва қизиқарли мавзулар билан суҳбатни бошқара олар, атрофдагиларнинг ёшлари ва касбларига қараб муомала ва муносабат қиларди. Ўзи жуда серқирра қизиқишлар соҳиби эди. Рубоб чалишни қотирар, мусиқий ва бадиий фильмлар тўплашга «касал» эди. Футбол оламининг билимдони, санъат олами кишиларининг чин дўсти эди. “Футбол юлдузлари” китоби муаллифи. Мамлакатимиз янги ва яқин тарихидан хабардор бўлган камсонли иқтидорлардан эди. Бу биз билганларимиз. Яна қалбида яширин қанча истеъдод ва интилишлари ҳам бўлган бўлиши керак.

Ахбор Имомхўжаев, Марат Асадуллаев, Ғуломжон Мусаев, Шоикром Исроилов сингари таниқли юртдошларимиз билан бир даврада улфатчилик килган дўстимиз Дилшод Исроилов хотираси дўстлари, улфатлари, ўртоқлари ва қадрдонлари қалбида абадий сақланади. Оллоҳим сафарингизни хайрли қилган бўлсин, дўстим!
Оиласи ва яқинларига ҳамдардлик билдирамиз.

Муслимбек Йўлдошев
Ўзбекистон Республикасида хизмат кўрсатган маданият ходими, олий тоифали сухандон