Фирдавс Асадов: "Тезроқ жамоага ёрдам беришни истайман"

Ушбу баҳс олдидан узоқ муддат жароҳатдан сўнг сафга қайтган ва ёшлар лигаси баҳсларига голлар киритишни бошлаган Фирдавс Асадов ўйин ҳақида фикрларини билдириб ўтди.

"Бугун бизнинг жамоани ҳар қачонгидан кўра оғир ўйин кутиб турибди. Бу ўйинда бизга уч очко сув ва ҳаводек муҳим. Ундан ташқари ўйин дерби мақомида кечади. Бу ҳам ўйин аҳамиятини белгилаб беради. Ким кўпроқ ҳужум қилса бугун ўша жамоа ғалаба қозонади. Ҳар икки жамоада ҳам имконият бир хил. Турнир жадвалида ҳам бу икки жамоанинг аҳволи ҳавас қиладиган даражада эмас. Бу эса ўйинга катта таъсир қилади. Умид қиламизки бугун уч очкони олиб қоламиз" - дейди Фирдавс Асадов ўйин ҳақида.

- Фирдавс, узоқ муддат танаффусдан сўнг яна ёшлар лигасида кўрина бошладингиз. Бу сизга қанчалик таъсир ўтказмоқда ?

Яна майдонга қайтганимдан хурсандман. Тезроқ катта футболга ҳам қайтишни ва жамоага ёрдам беришни истайман. Узоқ муддатли танаффус албатта жисмоний ҳолатимга таъсир ўтказган эди бироқ мен кўпдан бери машгулотлар билан ўз ҳолатимни тиклаб бормоқдаман. Ёшлар лигасида майдонга тушиб келмоқдаман. Энди асосий таркибга ҳам келди. Ўйлайманки, танаффус менга салбий таъсир ўтказмайди ва аввалгидан ҳам кўра кўпроқ ишлашим кераклигини англаб тураман.

"Машъал" матбуот хизмати