Финални Самарқандда катта экранларда томоша қилинг!

Равшан Ҳайдаров бошчилигидаги терма жамоамиз гуруҳ босқичидан сўнг чорак финал ва ярим финал баҳсларида Осиё грандлари саналмиш Япония ва Жанубий Корея сингари кучли терма жамоалар устидан йирик ҳисобдаги ғалабаларни қўлга киритиб, финалда Вьетнам терма жамоасига қарши саф тортишади.

Нафақат Ўзбекистон ёки Вьетнам, балки бутун Осиё кутаётган финал баҳсидаги ғалаба ҳар қандай мамлакат футболи тарихида янги саҳифа очади. Насиб қилса, финалда ҳам йигитларимиз ишончни оқлаб, чемпионликка эришишса бутун мамлакатимиз футбол ихлосмандлари учун байрам бўлади.

Финални байрамона руҳда томоша қилишни истаган самарқандлик мухлисларни Самарқанд шаҳридаги «Шарқ юлдузи» кинотеатрида (манзил: ГУМ) ташкил қилинган катта экранларда бирга томоша қилишга таклиф этамиз.

Ҳаяжонли ва шиддатли ўтиши кутилаётган, шанба куни соат 13:00да бошланадиган Ўзбекистон – Вьетнам финал учрашувини Самарқандда ҳам барча мухлислар бирга тўпланиб томоша қилишлари ва ҳаяжонли дақиқаларда Ўзбекистон терма жамоасини ғойибона бўлсада катта экран қаршисида биргаликда қўллаб-қувватлашга чақирамиз! Мухлислардан имкон даражасида Ўзбекистон байроғи билан бирга келишлари сўралади. Мухлислар залга соат 12:30 дан бошлаб киритилади. Мурожаат учун +998 90 657 56 40 (Усмон Ибодов) телефон рақамига қўнғироқ қилишингиз мумкин.

Ватанимиз жамоасини бирга қўллаб-қувватлаймиз! Чемпионлик сари, Олға, Ўзбекистон!