Фикр қолдириш масъулияти ёки ҳақоратларга қарши жанг ҳақида

Интернет – глобал тармоқ бўлиб, барчамизга ажойиб имкониятлар яратиб беради - ҳар бир оддий ўқувчи ўз ҳиссиётлари, эмоциялари, фикрлари, таклифлари, саволлари билан барчага бўлишиш ҳуқуқига эга. Бу албатта ажойиб.

АММО.

Сайтдаги фикрлар рейтинги, ҳақоратли сўзларни ўчириш, провокациялани тўхтатиш, ўқувчиларнин таклифидан келиб чиқиб сайтни янада ривожлантириш орқали биз портални янада яхши қилишга уринаяпмиз, бутун жамоа виждонан бу ишга киришган. Аммо бир насани ҳисобга олишингизни сўраб қолардик: Ҳар куни сайтга 100 мингдан ортиқ УНИКАЛ ўқувчи ташриф буюради, ҳар куни сайтга 3000дан 7000гача(!) фикр қолдирилади.

Тушуниб турганингиздек ҳар бир фикрни филтирлаш жуда катта ва оғир меҳнат талаб қилади – фойдаланувчи шартномасида аниқ қилиб ёзиб қўйилган: Қолдирилган фикрга айнан ўша ўқувчи ЖАВОБГАР ҳисобланади, сайт фикри эса у билан МОС ТУШМАСЛИГИ мумкин. Аммо кўплаб ўқувчиларимиз турли никлар, профиллар очиш орқали раҳбарият, футболчилар, мураббийлар ва бошқаларни куракда турмайдиган сўзлар билан ҳақоратлашади. Ўша ўқувчилар ўз оиласи даврасида ҳам шундай ёмон сўзларни ишлатишига бизда катта шубҳа бор. Бир неча ой давомида сайтимизда #бабаянаут хештегини кўплаб ўқувчилар ёзишди, энди у тарихга айланди ва бошқа инсонларни мана шундай ҳақоратлаш бошланмоқда…

Бунга биз нима деймиз?

Бизнинг меҳнатимизни қадрланг! Эртага сизнинг ўйлаб ўйламай гапираётган - ёзаетган гапларингиз учун бутун бир сайт жабр кўриб қолиши мумкинлиги ҳақида ўйланг!  Атрофга боқинг - ва шунга қараб хулоса қилинг. Бордию кимларгадир очиқ ойдин талаб ва эътирозларингиз булса - марҳамат ЎФФ сайти, портал ва бошқаларга ЎЗ номингиздан  очиқ мурожаат билан чиқинг, сайт орқасига НИК орқали беркиниш ва унинг фаолиятига таҳдид солиш ҳурматга лойиқ иш эмас. Сезган бўлсангиз асосли ва ўринли танқид, мулоҳазали таҳлил бизда ўз жойини ва "плюс"ларини топади.

Championat.asia сайти қоидаларни қўпол равишда бузаётган ўқувчиларга ШАХСАН қўнғироқ қилишни бошлаб юборди. Бизнинг журналистларнинг иш вақтини анчагина оладиган ушбу жараён орқали яқин орада ўз мевасини беришига ишонамиз, фикр қолдириш маданиятини ўстиришга ва келажакда сайтнинг шу маъромда ишлаб, янада ривожланишига умид қиламиз.

Агар бундай бўлавермаса, бундан ҳам қатъий чораларни қўллашга мажбур бўламиз…

PS:  ушбу мақола тахминан 10та профил очиб сўкиниш, ҳақорат ва сайтдаги деярли барча хабарлар тагида провокация ёзиб қолдирган ўқувчига бағишланади. Маъмурият қўнғироғидан сўнг ушбу ўқувчи уятдан ўзини қўярга жой топа олмай узр сўрашдан бошқа чораси қолмади…. Салом, қадрли

AsrorZiyodov,
AsrorZiyodov1999,  
AsrorZiyodov2000,
... шунингдек ўзини ҳам, атрофдагиларни ҳам умуман ҳурмат қилмайдиган ўқувчиларга бағишланади.

Матлуба Мустаева.