ЕЧЛ. "Бавария" - "Арсенал" ва "Атлетико" - "Милан" учрашувлари олдидан

Германия гегемони "Бавария" ўз уйида Лондоннинг "Арсенал" клуби билан беллашади. Куннинг яна бир бошқа ўйини "Атлетико" - "Милан" ўртасида кечади.

Мюнхен клуби ҳозирда ўзининг оптимал спорт формасида десак муболаға бўлмайди. Хосеп Гвардиола бошчилигидаги "Бавария" клуби ўз олдидан чиқаётган рақибларини бирин-кетин тор-мор қилишда давом этмоқдалар. "Арсенал" билан бўлиб ўтган Англиядаги баҳсда ҳам Мюнхен клуби ишончли ғалабага эришгани бежизга эмас. "Арсенал" олдида осон бўлмаган вазифа турибди. Арсен Венгер жамоаси кейинги босқичга чиқиши учун "Альянц-Арена"да икки тўп фарқи билан "Бавария"ни енгиши керак бўлади.



Ўтган мавсумда ҳам деярли шунга ўхшаш вазият юзага келгани ҳамманинг ёдида бўлса керак. "Бавария" Лондонда кечган дастлабки ўйинда (1:3) ҳисобида ғалаба қозониб келганди. Жавоб баҳсида эса "Арсенал" клуби Мюнхенда (0:2) ҳисобида "Бавария"ни мағлуб этишни уддасидан чиқишган-у, лекин меҳмонда урилган голлар эвазига Юпп Хайнкес жэамоаси кейинги босқичга йўл олганди. Агар ўтган йилги вазият билан таққослайдиган бўлсак, "Арсенал" ҳозирда ўтган йилгига нисбатан яхшироқ натижага эга. Қизиқ, лекин бу факт. "Арсенал" бу йилги ўз уйида кечган баҳсда иккита тўп ўтказиб юборди. Яъни, энди меҳмондаги икки тўп эвазига қўлга киритилиши мумкин бўлган ҳар қандай натижа Арсен Венгер жамоасини қаноатлантиради. Бу ерда икккита савол туғилади, "Бавария" ўтган йилги хатосини такрорлайдими, ёки "Арсенал" ўтган  мавсумдаги натижасини яхшилай оладими? Бу саволларга ўйиндан кейин жавоб оламиз.
Нима бўлган тақдир ҳам футбол ишқибозларини супер ўйин кутиб турибди.

Бугунги ўйинда "Арсенал"нинг асосий посбони Шчесни жамоасига ёрдам бера олмайди. Ўтган ўйинда Роббенга нисбатан ишлатган қўполлиги учун Шчесни майдонга четлатилганди. Арсен Венгер бугун Фабианскига ишонч билдиришга мажбур. Шунингдек, Лондон жамоаси таркибида яна бир қатор жароҳатланган футболчилари мавжуд. Монреаль, Косьелни, Гиббс, Чельстрем, Уилшер, Рэмзи, Диаби, Уолкот каби футболчилар бугунги учрашувда жамоасига ёрдам бера олмайди.

"Бавария"да катта йўқотишлар йўқ. Барча футболчилар ўйинга тайёр. Хосеп Гвардиола ушбу баҳсда таркибда бир қатор ўзгартиришлар қилиши табиий. "Бавария" сафида кўплаб иқтидор эгалари тўп суришади ва деярли ҳар бир ўйинда таркибда янгиликлар кузатилади. Мюнхен клуби мухлислари ёқимтойи Франк Рибери "Арсенал"га қарши илк ўйинни ўтказиб юборганди. Франциялик чарм тўп устаси жароҳатидан фориғ бўлган ва ушбу учрашувни асосий таркибда бошлаши кутилмоқда.



Шунингдек бугун яна бир қизиқарли баҳс мухлислар эътиборида бўлади. Италиянинг "Милан" жамоаси сафарда Испаниянинг ҳозирда иккинчи рақамли футбол клуби бўлиб турган "Атлетико" билан баҳс бойлайди. Диего Симеоне шогирдлари илк ўйинда меҳмонда ўзлари учун муҳим бўлган ғалабага эришиб қайтишганди. Бугунги ўйинда эса жамоа ушбу устунликни сақлаб қолиб, кейинги босқич масаласини ҳал этишни мақсад қилган. Кларенс Зеедорф бошқарувидаги "Милан" клуби эса вазиятни ўз томонларига ўзгартиришни исташмоқда. Гарчи ўз уйидаги ўйинни рақибга бой берган бўлишсада, ўша баҳсда Кларенс Зеедорф бошчилигидаги жамоа учрашувни ёмон ўтказмаган эди. Фақатгина юзага келган вазиятлардан унумли фойдаланиш бўйича жамоа футболчилари оқсашганди.  "Милан" жамоаси бугунги ўйинда нима қилиб бўлсада, кейинги босқич йўлланмасини ҳал этишни ўйламоқда. Агарда "Милан" "Атлетико" дарвозаси томон йўл топа олса, унда барча устунликни ўз томонига оғдириб олиши мумкин. Бунинг учун Италия жамоаси тезкор гол киритиши талаб этилади. Лекин шуни унутмаслик керакки, "Атлетико" майдонида ҳар қандай рақибга осон бўлмаслиги аниқ. Айни пайтда Диего Симеоне шакллантираётган жамоа ўйиндан-ўйинга кучайиб бормоқда. Испанияда "Атлетико" қаршилигини енгиш осон бўлмайди. Лекин рақиб анойи жамоа эмас. Бу "Милан". "Милан" жамоаси эса Диего Симеоне айтганидек, бундай мусобоқаларда, бунақанги учрашувларда қандай ҳаракат қилишни жуда яхши билади.  Демак тунда бўлиб ўтадиган учрашувдан кейин ғолиб номини билиб оламиз. Бу беллашув мухлисларни зериктириб қўймаслиги аниқ.
Коста ва Балотелли қарама-қаршилигининг иккинчи қисми бугун давом этади. Биринчи ўйинда "Атлетико"га ғалаба келтирган ягона гол муаллифи айнан Коста бўлган эди. Демак ҳозирча Коста Балотеллини ортда қолдирмоқда. Лекин бугун Балотеллида ҳаммасини ўзгартириб юбориш имконияти мавжуд. Кузатамиз!



Чемпионлар Лигаси, 1/8 финал жавоб ўйинлари. 11 март, сешанба.

"Бавария" - "Арсенал" (00:45 "Спорт", "НТВ-ПЛЮС Футбол")

"Альянц Арена" стадиони.

Ҳакамлар: Свейн Моэн, Ким Хаглунн, Франк Андас.

Тахминий таркиблар:

"Бавария": Нойер, Алаба, Данте, Боатенг, Лам, Швайнштайгер, Тиаго, Гётце, Роббен, Рибери, Манжукич.

"Арсенал": Фабиански, Женкинсон, Санья, Вермален, Мертесакер, Чемберлен, Ўзил, Фламини, Касорла, Артета, Жиру.

Биринчи учрашув: ("Арсенал" - "Бавария" 0:2)



"Атлетико" - "Милан"  (00:45 "НТВ-ПЛЮС Футбол2")

"Висенте Кальдерон" стадиони.

Ҳакамлар: Марк Клаттенбург, Саймон Бек, Стюарт Берт.

Тахминий таркиблар:

"Атлетико": Куртуа, Годин, Хуанфран, Инсуа, Миранда, Арда Туран, Фернандес, Мендеш, Коке, Коста, Вилья.

"Милан": Аббьяти, Рами, Де Шильо, Бонера, Эссьен, Поли, Кака, Таарабт, Эмануэльсон, де Йонг, Балотелли.

Биринчи учрашув: ("Милан" - "Атлетико" 0:1)



Ҳақиқий футбол ҳавосини ҳис этинг! Евро-футбол Сиз азиз футбол ишқибозларига қизиқарли футболларни намойиш этишда давом этади. "Championat.asia" сайтидан узоқлашманг, соғ бўлинг!

Шаҳбоз Беғамов