Диёр Имомхўжаев: “Реал”да Зидан ва Перес бор. “Барселона” эса ҳозир ҳам фақат Мессига ишонаётгандек

“Реал” Альваро Мората, Ҳамес Родригес каби футболчиларни қўйиб юборганида ажаблангандим, кучли захирага путур етдими деб. “Сантьяго Бернабеу”даги ўйин Зидан тўғри йўлдан кетаётганини кўрсатди. У юқоридаги футболчилар билан ўтган мавсум захирасини шакллантириб олди. Кейин эса кетиш ниятига келиб улгурганларни мажбуран ушлаб турмади ва Пересга ҳам 1-2 сўм ишлаб олиш имкониятини яратиб берди. Фақат футболчи талаб қиладиган Пеп ва Жозе билан солиштирганда, Зидан ҳозир фариштанинг ўзгинаси.

“Камп Ноу”даги даҳшатдан кейин “Барселона” кичик ҳисобда бўлса-да Мадриддан ғалаба билан қайтади деб ишонгандим. Бироқ “Реал” иккинчи учрашувда ҳам “Барселона”га ҳеч қандай имконият қолдирмади. Роналду, Иско, Бэйл ўйнамаган, Каземиро эса захирадан майдонга тушган ўйинда “Барселона” таслим этиляптими, демак бу каталонияликлар учун огоҳ қўнғироғи. “Барселона”да катта ўзгариш вақти келган.

Ҳа, мен бунда президент масаласини ўртага қўймоқдаман. Переснинг қайтиши “Реал”ни оёққа турғазди. Бу жамоа ўзига келди дегани, “Барселона”нинг ишлари орқага кетаётганини билдиради. Чемпионлар лигасидаги кетма-кет муваффақиятсизликлар, ўтган мавсум Ла лигада “Реал”нинг зафар қучгани, Неймарнинг жамоадан кетиши бу борада етарлича асос бўлиши мумкин. Вальверденинг олиб келиниши ҳам балки кўп тўғри бўлмагандир, билмадим, мавсум ҳали бошланиб улгурмади. Балки Круифф ҳаёт бўлганида Рональд Куман ёки бошқа бир мутахассисни тавсия қилиши ҳам мумкин эди. Ҳозир эса Эрнесто фаолиятини жуда расво бошлади. Бунда биргина Неймарнинг йўқлиги катта муаммо бўлди десам, “Барселона”дек клуб бир унга боғланиб қолмаган-ку дегувчилар топилиши мумкин. Ҳа, Неймар ҳали Месси бўлиб улгурмаганди, шу ерда қолса бўла олмаслигини тушунгани учун ҳам Парижга кетиб қолди. Бироқ Неймар ва Суарес келгунича ҳам Каталония клубига яқинлашишнинг ўзи қўрқинчли эди, тўғрими?

Хави кетди, Иньестанинг ёши ўтиб қолди, Бускетс олдингидек эмас. Ва мана энди Неймар ҳам йўқ. Айтмоқчи бўлганим, бутун мавсум давомида биргина Месси аравани тортиши қийин масала. Клуб Дембеле ёки Коутиньони олмаса, умуман бўлмайдигандек. Делофеунинг қайтиши ёки янги харид қилинган бошқа футболчилар, тарк этганлар ўрнини босадиган даражада эмас. “Реал”да эса ҳали Иско ёриб чиқмоқда, ҳали Асенсио, ҳали Каземиро, бир қарасанг Лукас Васкес. Зидан эса жон жаҳди билан Бэйл ёки Роналдунинг ўзигагина боғланиб қолмайдиган жамоа қуришга уринмоқда. Мана шу ҳаракатнинг ўзи Зидан тўғри йўлда эканини исботлайди.

Пеп “Барселона”га келиб Роналдиньосиз жамоага асос солди. Энрике ҳужумда МСН триосини ҳосил қилди. Ўтган икки ўйинда мен Вальверденинг ҳеч қандай имзосини кўрмадим. Чамамда у аниқ бир тўхтамларга келишда катта қийинчилик сезган. Бир тарафдан Неймарнинг кетгани ҳам яхши, Энрике яратган рецептдан шунчаки фойдаланадиган мутахассис нега керак? Мен ҳозир Вальверденинг янги мавсумга совғасини кутиш билан бандман. Агар ҳаммаси йил охиригача шундай қолса, “Барселона” балки 2-ўриндан ҳам пастга тушиб кетиши мумкиндир...