Coca Cola Суперлигаси. 18-тур лауреатлари

Сайтимиз ўз анънасига содиқ қолган ҳолда тур лауреатларини аниқлади. 

"Сўғдиёна" дарвозабони Милан Митрович якунланган турда "Локомотив" билан баҳсда ажойиб ўйнади. "Темирйўлчилар"нинг кўплаб ҳужумлари ва зарбаларидан кейин Митрович жамоасини голлардан қутқариб қолди ва ҳақли равишда championat.asia талқинига кўра 18-турнинг энг яхши дарвозабони деб топилди.

"Сўғдиёна" ҳимоячиси Шаҳбоз Жўрабеков "Локомотив" билан баҳсда ажойиб гол уришга муваффақ бўлди. Белгиланган жарима тўпини Жўрабеков чиройли тарзда рақиб дарвозасига йўллади. Шу тариқа Шаҳбоз Жўрабековнинг голи Championat.asia талқинига кўра турнинг энг чиройли голи деб топилди.

Бу турда Қаршида Қашқадарё дербиси бўлиб ўтди. Унда "Насаф" "Машъал"ни қабул қилди. Шу куни "аждарлар" ҳужумчиси Бобир Абдихолиқов жуда ҳам фаол ўйнади. Иккинчи таймда ҳужумчи иккита гол уришга эришди ва Абдихолиқовнинг бу мавсумдаги голлари сони 14тага етди. Шу боис Championat.asia талқинига кўра Бобир Абдихолиқов 18-турнинг энг яхши футболчиси деб топилди.

Бу тур Навоийда "Қизилқум" "Қўқон-1912"ни қабул қилиб 2:1 ҳисобида ғалабага эришди. Бир нечта турдан буён ғалаба қозона олмаётган "Қизилқум" бу сафар ўз майдонида иродали ғалабани қўлга киритди. Championat.asia талқинига кўра Ҳамиджон Актамов 18-турнинг энг яхши мураббийи деб топилди.